Կամ՝ ինչպես ազատվել «մեծապատիվ մուրացկանությունից»
Հզոր երկրները իրենց խոշորամասշտաբ ակադեմիական մշակութային կոլեկտիվներով հաճախ են ներկայանում աշխարհին: Մեր պետական այրերն էլ մշտապես հնչեցնում են, թե առաջին հերթին աշխարհին պետք է ներկայանանք մեր բազմադարյա մշակույթով: Մինչդեռ, վերջին շրջանում «աշխարհին ներկայանալը» իրականացվում է որոշ արվեստագետների կամ փոքր խմբերի անձնական նախաձեռնությամբ եւ միջոցներով: Ըստ էության, մշակութային միակ միջոցառումը, որ իրականացնում է պետությունը, դա Հայաստանի օրերն են տարբեր երկրներում:
Իսկ ի՞նչ պետք է անել այս՝ իսկապես կարեւոր խնդիրը լուծելու համար, «Առավոտը» դիմեց մշակույթի ճանաչված դեմքերին:
Անվանի խմբավար Հովհաննես Չեքիջյանի պատասխանը հակիրճ էր: Նա վանկարկեց՝ հո-վա-նա-վոր:
Կարդացեք նաև
Ազգային օպերային թատրոնի տնօրեն Կամո Հովհաննիսյանն էլ կարծում է, որ հարցը կլուծվի Հայաստանում հովանավորչության ինստիտուտի առկայության դեպքում: Պարոն Հովհաննիսյանը հիշեցրեց, որ անցնող տարվա ընթացքում մշակույթի նախարարության աջակցությամբ օպերային թատրոնի 17 մեներգիչ հանդես է եկել Սանկտ Պետերբուրգի Մարիինյան թատրոնում, բալետային խումբն էլ «Սպարտակը» ներկայացրել է Քաթարում: «Դասական արվեստի ոլորտում, ինչպես ողջ աշխարհում, այնպես էլ մեզանում անհրաժեշտ են հովանավորները, որոնք աջակցելով բարձրակարգ արվեստին, նախ կվայելեն հասարակության հարգանքը՝ գումարած հարկային դաշտում արտոնության իրավունքը»,- հայտնեց տնօրենը:
Ֆիլհարմոնիկ նվագախմբի տնօրեն Ռուզաննա Սիրունյանի փոխանցմամբ՝ հրավիրող կողմը հաճախ որոշակի ծախսեր վերցնում է իր վրա՝ մյուս մասը թողնելով նվագախմբի տնօրինությանը. «Ֆիլհարմոնիկը մշտապես ունենում է հրավերներ: Հասկանալի պատճառով մշակույթի նախարարությունը չի կարող հոգալ մեծ կոլեկտիվի հյուրախաղերի ողջ գումարը, անհրաժեշտ է հովանավոր, որն իր վրա կվերցնի գոնե ճանապարհածախսը: Իհարկե, մենք երջանիկ ենք՝ ունենալով «ՎիվաՍել ՄՏՍ»-ի հովանավորությունը, սակայն հիշեցնեմ, որ այն մեզ աջակցում է Հայաստանում»:
Պարարվեստի «Բարեկամություն» անսամբլի գեղարվեստական ղեկավար Նորայր Մեհրաբյանը նշեց, որ 2013թ. իրենց հյուրախաղերը՝ 2 անգամ Սանկտ Պետերբուրգ եւ Բելառուս, հովանավորել է մշակույթի նախարարությունը: Շեշտեց, որ անսամբլը վայելում է «ՎիվաՍել ՄՏՍ»-ի հովանավորությունը, այդուհանդերձ, պարոն Մեհրաբյանն էլ հավաստիացնում է, որ մեր ժամանակներում անհրաժեշտ է հովանավորի առկայությունը: «2014թ. «Բարեկամությունը» հրավիրված է Ֆրանսիա, իսկ ծախսերը հոգում են Ֆրանսիայի եւ մեր մշակույթի նախարարությունները»,- հայտնեց պարոն Մեհրաբյանը:
Արդեն տեւական ժամանակ է, որ մշակույթի, գիտության եւ այլ ոլորտների գործիչները հնչեցնում են Հովանավորչության մասին օրենքի անհրաժեշտության մասին, մի բան, որ ինքնըստինքյան մասնավոր հատվածին եւ անհատներին կմղեր աջակցել այդ ոլորտները, ու մտավորականներին էլ կձերբազատեր մեծապատիվ մուրացկանի կարգավիճակից:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
Աշխարհում մշակույթը և արվեստը զարգացել ու զարգանում է շուկայի զարգացման սկզբունքով: Մեզ մոտ էլ անհրաժերտ է, առաջին հերթին, զարգացնել մշակութային շուկան` կազմակերպելով հասարակությանը հոգեհարազատ համերգներ և ներկայացումներ:Այդ դեպքում ժողովուրդը կգա և տոմսեր կգնի` ապահովելով լիքը դահլիճներ … իսկ հովանավորողները առանց օրենքի էլ իրենց ներդրումները կանեն … Հարգանքով` Ա. Բաբայան