«Մաքսային միությանը հանգրվանելը շատ կարեւոր է Հայաստանի համար ու հաստատ լավ կլինի: Ավելի նպատակահարմար եմ համարում Մաքսային միությանն անդամագրվելը»,- այսօր «Փաստարկ» ակումբում ասաց տնտեսագիտության դոկտոր Վարդան Բոստանջյանը:
Հարցին, թե ՄՄ-ի կազմում Հայաստանի լինելը որքանո՞վ կնպաստի Հայաստանի տնտեսության զարգացմանը, պարոն Բոստանջյանը պատասխանեց՝ լավատեսության գիրկը չի ընկել, բայց հավատում է. «Հայաստանն ունի լայն հնարավորություններ գրանցելու առաջընթաց: Նախորդ պատմությունը ցույց է տալիս, որ այդ տիրույթում գտնվելով՝ Հայաստանը միշտ առաջնեկ է եղել, առաջավոր դիրքերում ու նրանց կողմից ողջունված: Վստահ եմ, որ այդ դիրքերը պահպանվելու են, եթե մեզ մոտ կառավարումը տեղի ունենա բարձր մակարդակով: Եթե շարունակվի այսպես, ինչպես հիմա է, ապա ոչ մի առաջընթաց էլ չի գրանցվի»:
Նա այս տարվա տնտեսական զարգացումներն էլ է ոչ դրական գնահատում եւ կրկին պայմանավորում կառավարման ցածր որակով. «Բոլոր այն ոլորտները, որտեղ ունենք պոտենցիալ հնարավորություններ առաջընթացի, որոշումներ կայացնողները չեն կարողանում կողմնորոշվել ճիշտ որոշումներ կայացնելու հարցում»:
Արփինե ՍԻՄՈՆՅԱՆ
