Այսօր Նախախորհրդարանի մի խումբ ակտիվիստներ դրամահավաք անցկացրին Մաշտոցի պուրակում: Հավաքված գումարը վարչական տույժերի ենթարկված ակտիվիստներին ֆինանսապես սատարելու նպատակով էր: Դրամահավաքին մասնակցեցին հենց իրենք՝ ակտիվիստները, թեեւ նրանք նախատեսել էին դրամ հավաքել անցորդներից:
«Ազգի կեսը չկա, երբ ամեն երկրորդ տունը վաճառված է կամ վարձով է տրվում, երբ որբերն ու միայնակ կանայք ավելի շատ են, քան 20 թվականին: Մենք այսպիսի խայտառակ երկրի համար չենք մեծացրել մեր երեխեքին: Պետք է ազատագրենք մեր երկիրը»,- ասաց Նախախորհրդարանի անդամ Տիգրան Խզմալյանը:
Հետո նա ասաց, որ երկիրն ազատագրելու համար գործելու են եւ չեն քնելու. «Թող Սերժ Սարգսյանը քնի՝ ստորագրելով այն պայմանագրերը, որոնք մենք միեւնույնն է ճղելու ենք»:
Ակտիվիստները իրենց գումարները փոխանցեցին, հետո երգեցին, պարեցին ու հեռացան հավաքած գումարը հաշվելու:
Կարդացեք նաև
58.000 դրամով Վարչական տույժի ենթարկված Տիգրան Խզմալյանն էլ մեզ հետ զրույցում ասաց՝ Մաշտոցի պուրակ են եկել ոչ միայն պուրակի ազատագրման հաղթանակը հիշելու. «2 տարի առաջ էր, որ Մաշտոցի պուրակը հայտնվեց քաղաքական քարտեզի վրա: Եկել ենք ոչ թե վերհիշելու հաղթանակը, այլ հիշեցնելու, որ ամեն ինչ հնարավոր է, եթե մարդիկ չեն վախենում: Հիմա հասարակությանը խնդրում ենք խորհրդանշական մասնակցություն. Մանրադրամով աջակցեն այն մարդկանց, որոնք պատժվել են իբրեւ թե ոստիկանների օրինական պահանջը չկատարելու համար»:
Արփինե ՍԻՄՈՆՅԱՆ
Մանրամասները՝ տեսանյութում:
