«Տարեցտարի մեր տնտեսությունը դանդաղ, բայց ինչ-որ չափով աճ արձանագրում է. պակասում է դեֆիցիտը, նախորդ տարվա համեմատ արդյունաբերության ոլորտում կունենանք ինը տոկոսից ավելի աճ»,-«Սլաք» մամուլի ակումբում հայտարարեց Հայրենական ապրանք արտադրողների միության նախագահ, Հանրային խորհրդի ֆինանսաբյուջետային և տնտեսական հարցերով հանձնաժողովի նախագահ Վազգեն Սաֆարյանը:
Նա նաև շեշտեց, որ դեռ խնդիրներ կան պետություն և մասնավոր ընկերություն համագործակցության դաշտում, ինչը դեռ պետք է զարգացնել:
Որպես ձեռքբերում՝ պարոն Սաֆարյանը նշեց. «Կառավարության սահմանած գերակա ուղղություններին ավելանում է նաև տեքստիլագործությունն ու արդյունաբերությունը»:
Վազգեն Սաֆարյանը նկատեց, թե տնտեսության զարգացման վեկտորը տեղափոխվում է արևելյան երկրներ ու Եվրոպայի տնտեսական ճգնաժամի մասին ասաց. «Եվրոպական երկրներն իրենք էլ հայտարարում են, որ իրենց մոտ դեռ ճգնաժամը հաղթահարված չէ: Իտալիայում և Իսպանիայում ճգնաժամը զգացնել է տալիս: Ինչ որ առումով բարվոք վիճակում են Հոլանդիան, Բելգիան և Գերմանիան: Եվրոպայում սպասվող նոր ճգնաժամի միտումներ են նկատվում»:
Կարդացեք նաև
Ի հակադրություն Եվրոպայում ստեղծված իրավիճակի՝ պարոն Սաֆարյանն ասաց, որ Մաքսային միության տարածքում ապրանքաշրջանառությունը 30 տոկոսով աճել է»:
Տաթև ՀԱՐՈՒԹՅՈՒՆՅԱՆ
