«Ի՞նչ զարգացումներ են սպասվում գազային համաձայնագրի շուրջ։ Հնարավոր համարո՞ւմ եք համաժողովրդական մեծ ալիքի բռնկումը», «ՉԻ»-ն երեկ հարց ուղղեց ՀԱԿ խմբակցության ղեկավար Լեւոն Զուրաբյանին։ Վերջինս պատասխանեց. «Ընդհանրապես ԱԺ-ում տեղի ունեցած վերջին իրադարձություններն աննախադեպ էին։ Փաստորեն անգամ լրագրողները, ովքեր կոչված են չեզոքություն պահպանել, չդիմացան եւ կատարեցին քաղաքացու իրենց պարտքը։ Կարելի է ասել, որ այսօր Հանրապետական մեծամասնությունը, որն իրականում կեղծ մեծամասնություն է, ընտրությունները ի սկզբանե կեղծելու իր գործելաոճով, հայտնվել է կատարյալ մեկուսացման մեջ։ Ամբողջ մեր հասարակությունը փաստորեն այսօր ապստամբել է այդ որոշման դեմ։ Սա, կարծում եմ, իրենց համար պետք է շատ լուրջ ահազանգ լինի»։
Անդրադառնալով Դ. Հարությունյանի հայտարարությանը, ըստ որի՝ համաձայնագրի մեջ հնարավոր է փոփոխություններ կատարել, Զուրաբյանն ասաց. «Իսկ արդյո՞ք հակառակ կողմը դրան պատրաստ է։ Հիմա ներկայացվում է արդեն բանակցված մի փաստաթուղթ, որտեղ արդեն բոլոր շահերը զիջված են։ Հետին թվով հայտարարություններ անել, թե մեր դիրքերը կամրապնդենք, դա այլեւս ոչ մի հավատ եւ վստահություն չի ներշնչում։ Հատկապես, երբ որ այդ հավաստիացումները տրվում են իշխող մեծամասնության կողմից, որը արդեն խախտել է ե՛ւ Սահմանադրությունը, ե՛ւ օրենքները, ե՛ւ Հայաստանի շահերն ու Հայաստանի ինքնիշխանությունը»:
Հոդվածն ամբողջությամբ կարող եք կարդալ «Չորրորդ իշխանություն» թերթի այսօրվա համարում
