Եվրասիական տնտեսական բարձրագույն խորհրդի նիստի ընթացքում նախագահների մակարդակով երեկ ստորագրվել են տասը փաստաթղթեր, որոնց միայն վերնագրերն են տեղադրված ՌԴ նախագահի պաշտոնական կայքում։ Դրանցից ամենաուշագրավը թերեւս 6-րդ փաստաթուղթն է՝ «ՄՄ անդամ երկրների եւ միասնական տնտեսական տարածքում տրանսսահմանային շուկաներում մրցակցության միասնական կանոնների պահպանման լիազորությունները Եվրասիական տնտեսական հանձնաժողովին վերապահելու մասին»։ Սա նշանակում է, որ մաքսային ծառայության վերահսկողությունը Հայաստանում, ըստ էության, իրականացվելու է Մոսկվայից։
Ստորագրված տասը փաստաթղթերից երեքն էլ վերաբերում են բնական մոնոպոլիաների գործունեությանը։ Սա էլ ուշագրավ է նրանով, որ Հայաստանում բնական մոնոպոլիաները մեծ մասամբ ՌԴ-ին են պատկանում, ինչպես օրինակ՝ երկաթուղին, գազամուղները, էլեկտրական բաշխիչ ցանցերը։ Երեկվա նիստում ՌԴ նախագահը, հայտարարելով, որ ընդհանուր անդրսահմանային շուկայում մրցակցության չափանիշներին հետեւելու վերահսկողության հիմնական դերը փոխանցվելու է Եվրասիական տնտեսական հանձնաժողովին, ասել է. «Դրա հետ մեկտեղ մեր ընկերությունները կկարողանան ներդրումներ կատարել եւ իրենց բիզնեսը զարգացնել միասնական հակամենաշնորհային կանոններով։ Մաքսային միության շրջանակներում սահմանափակումների եւ արգելքների ցուցակը պետք է ձեւավորվի մինչև 2014թ. մարտի 1-ը»։ Իսկ թե ինչ է իրենից ներկայացնում «հակամենաշնորհային կանոնները» ըստ Պուտինի, կարելի է պատկերացնել միայն այն օրինակով, որ ՌԴ ամբողջ գազային համակարգը, ամբողջ երկաթուղին, ամբողջ էլցանցերը բացարձակ եւ անվերապահ մենաշնորհներ են։
Լուսինե ԲԱՐՍԵՂՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
