Քիչ առաջ ոստիկանությունը հայտնաբերել է Շիրակի մարզի ընդհանուր իրավասության դատարանի բակից փախուստի դիմած 23-ամյա Ռոբերտ Ջիվանի Մուրադյանին: Պարզվում է, որ երեկ դատարանը քննել է վերջինիս նկատմամբ սանկցիա կիրառել-չկիրառելու հարցը, դատը ավարտվելուն պես, երբ ոստիկանները երիտասարդին ուղեկցել են բակ` կալանավորների մեքենա նստեցնելու ու Արթիկ քրեակատարողական հիմնարկ տեղափոխելու համար, նա դիմել է փախուստի` վազելով դատարանին հարակից Տեքստիլ թաղամաս: Ոստիկանները, այդ թվում դատարանի կարգադրիչները վազել են նրա հետևից, սակայն Ռոբերտ Մուրադյանը վայրկենապես անհետացել է տեսադաշտից` մտնելով այդ մեծ թաղամասի շենքերի արանքները:
Դատարանի կարգադրիչները երկար ժամանակ այդ սառնամանիքին պահակություն են արել քաղաքի կենտրոնական թաղամասում, անգամ թակել են Տեքստիլ թաղամասի բնակիչների դռներն ու հարցուփորձ արել փախուստի դիմած կալանավորից: Սակայն նրանց ջանքերն ապարդյուն են անցել:
Գյումրեցի վարորդների ասելով, երեկվանից իրենց համար համարյա թե արտակարգ դրություն էր, ոստիկանությունը կանգնեցնում էր նույնիսկ քաղաքի ծայրամասային Մուշ թաղամաս գնացողներին ու ստուգումներ անցկացնում:
Նշենք, որ Ռոբերտ Մուրադյանը մեղադրվում է ավազակային հարձակում կատարելու մեջ, ըստ մեր տեղեկությունների, նա փորձել էր թալանել Գյումրու 102-րդ ռազմաբազայում ծառայող երկու ռուս զինվորականների:
Կարդացեք նաև
Մի խոսքով, թեև ոստիկանները նրան փնտրում էին Գյումրիի սահմաններից դուրս, սակայն հայտնաբերեցին Գյումրու ռեստորանային համալիրներից մեկում: Այս փաստի առթիվ հարուցվել է քրեական գործ քրեական գործ ՀՀ քրեական օրենսգրքի 355 հոդվածի 1-ին մասի հատկանիշներով: Հոդվածը, որը կոչվում է «Փախուստն ազատազրկման վայրից, կալանավորվածներին պահելու վայրից կամ ձերբակալվածներին պահելու վայրից», նախատեսում է հետևյալ պատիժը. « Կետ 1-ին` Փախուստն ազատազրկման վայրից, կալանավորվածներին պահելու վայրից կամ ձերբակալվածներին պահելու վայրից` պատժվում է ազատազրկմամբ` առավելագույնը երեք տարի ժամկետով»:
Չի բացառվում, որ կալանավորին ուղեկցող ոստիկանները ազատվեն աշխատանքից:
Նունե ԱՐԵՎՇԱՏՅԱՆ
