«Ժառանգություն» կուսակցության փոխնախագահ Արմեն Մարտիրոսյանն էլ «ՀայՌուսգազարդի» 20% բաժնեմասը ՌԴ-ին ` Հայաստանի 300 միլիոն դոլար պարտքի դիմաց հանձնելու համաձայնագրի քվեարկությունը բացատրում է յուրովի. «Իշխանությունը մեր քվեով չի ձեւավորվել, այլ Ռուսաստանի «դոբրոներով» է ձեւավորվել: Դրա համար էլ առաջին հերթին հենց Ռուսաստանին էլ պետք է ծառայեն: Այստեղ անսպասելիություն չկա»:
Պարոն Մարտիրոսյանի խոսքով, ԱԺ-ի դիմաց այսօր հավաքված քաղաքացիներն էլ իշխանություններին սթափության կոչ անելու են եկել. «Այս ամենից հետո մի ելք կա: Քանի որ ունենք մի իշխանություն, որ աշխատում է Սահմանադրության դեմ, չկա այլ ելք, քան իշխանափոխությունը»:
ԱԺ-ի դիմաց ընթացող բողոքի ակցիաներին մասնակցում էր նաեւ ՀՀ ազգային անվտանգության նախկին նախարար Դավիթ Շահնազարյանը. «Այստեղ եկել են մարդիկ, որոնք վստահ էլ չէին, որ իրենց գալով կփոխվի: Եկել են, որովհետեւ չէին կարող չգալ: Այո՛, փոխվելու է Հայաստանը: Ազատվելու ենք այս իշխանություններից եւ պաշտպանելու ենք մեր պետականությունն ու ինքնիշխանությունը: Այս իշխանությունները հասարակությանը դրդում են ապստամբության»:
Արփինե ՍԻՄՈՆՅԱՆ
