Այսօր ՀՀ վարչական վերաքննիչ դատարանը` 3 դատավորներով, մայրաքաղաքից ժամանել էր Գյումրու ամենակենտրոնական փողոցներից մեկի` Խրիմյան Հայրիկ 59 հասցեի շենքի բակ` դատավարությունն այստեղ անցկացնելու համար:
Շենքի բնակիչների ներկայացմամբ, իրենք ուղիղ 13 տարի դատարաններում են, քանի որ հարակից «Պրոգրես» համալսարանի ռեկտոր Ռաֆիկ Խաչատրյանը փորձում է խլել իրենց բնակարանները, որտեղ 30 տարուց ավել ապրում են իրենք` փոստատան նախկին աշխատակիցները: Բանն այն է, որ ռեկտորը, քավորասանիակական կապերի մեջ լինելով այն ժամանակվա Շիրակի մարզպետ Ֆելիքս Փիրումյանի հետ, 2002 թվականին անհատույց նվիրատվությամբ ձեռք է բերել նախկին փոստատան շենքը` այդ թվում և այն 350 քառ.մետրը, որտեղ 1978 թվականից սկսած փաստացի բնակվում են 7 ընտանիքներ`32 անձով: Այսինքն` ստացվում է , որ նախկին մարզպետը իր սանիկին լավություն է արել`բնակիչներին անօթևան թողնելու հաշվին: Այս պահին բնակիչներին սպառնում է փողոցներում հայտնվելու վտանգը:
Նրանք այսօր ամենավերջին անեծքն էին հնչեցնում համալսարանի ռեկտորի ու դատարանների հասցեին` Գյումրին ևս 7 անօթևան ընտանիքներով համալրելու պատրաստակամության համար: «Դատարան էլ մեռնի, անունն էլ հետը, հերիք ու բոլ եղավ , էս դատավորից էն դատավորի մոտ են ուղարկում, նրա մոտից սրա մոտ, մեզ առաջարկում են գնալ ու փողոցներում ապրել, ոչ մի փոխհատուցման մասին խոսք չկա, էդ հրեշը, գայլը, թուրքը էդպես է ուզում, որ մենք փողոցներում ապրենք, բայց ուր գնանք»,- զայրացած բացականչում էր տարեց բնակչուհիներից մեկը` Թամարա Գալոյանը:
Մեկ այլ բնակչուհի էլ` Հունանյան Իրինան, ասաց, որ ինչքան բարձրանում են դատական ատյաններով, այնքան ապշահար են լինում հայկական արդարադատության սնանկությամբ: «Առաջարկում են գնացեք, փողոցներում ապրեք,մի բան գիտեմ, որ այս երկրում ոչ թե օրենքը ուժ ունի, այլ ուժը օրենք»,-ասաց տիկինը:
Կարդացեք նաև
Բնակիչների շահերը ներկայացնող Սուսաննա Մխիթարյանի ասելով էլ, խաբեություն է, թե կառավարության որոշմամբ «Պրոգրես» համալսարանի ռեկտորին հատկացվել է այն 350 քառ մետր տարածքը, որտեղ փաստացի բնակվում են մարդիկ: Ըստ փաստաբանի, դա ամենևին չի վերաբերում բնակեցված տարածքին, այլ վերաբերում է հենց «Պրոգրես» համալսարանի փաստացի զբաղեցրած տարածքին, այսինքն` փոստատան նախկին շենքին: Թե փաստաբանը, թե բնակիչները պնդում են, որ նախկին մարզպետ Ֆելիքս Փիրումյանը քննչական բաժնում ներողություն է խնդրել ժողովրդից` ասելով, որ թյուրիմացություն է եղել և հույս է հայտնել, որ այդ 350 քառ. մետր տարածքը դատական կարգով կնվիրաբերվի ժողովրդին:
Դատարանն այսօր տեղատեսություն արեց` զննելով 7 ընտանիքների տները,այդ թվում և «Պրոգրես» համալսարանը: Դատարանի` համալսարանը տեղազննելու ընթացքում բնակիչները անեծքներին էին հնչեցնում համալսարանի ռեկտորի հասցեին, որին ի պատասխան մի երիտասարդ վիճաբանության մեջ մտավ կանանց հետ, հայհոյեց նրանց: Բնակիչները նրա հետևից գոռում էին`«դու բարի եղի, բանակում ծառայի, նոր խոսի»: Այնուհետ մեզ պարզաբանեցին, որ իրենք վիճում էին համալսարանի ռեկտորի որդու հետ:
Հետաքրքիրն այն է, որ շենքի բակում ու տներում անցկացվող դատավարության ժամանակ արգելվեցին տեսանկարահանումները: Լրագրողների այն հարցին, թե ո՞ր իրավունքով, դատավորը հարցրե՞լ է կողմերի կարծիքները, դատավորը անընդհատ կրկնում էր, որ սա քաղաքացիական դատավարություն չէ, Վարչական դատավարության մասին օրենսդրությունը արգելում է տեսանկարահանումները:
Բնակիչները առանձնապես հույսեր չէին փայփայում այսօրվա փողոցային դատավարությունից: Նրանք աշխատանքի չէին գնացել , որպեսզի այդ սառնամանիքին մասնակից լինեին դատավարությանը:
«Պրոգրես» համալսարանի ռեկտոր Ռաֆիկ Խաչատրյանն էլ իր պարզաբանումները ներկայացրեց այս հարցի շուրջ: Նա ասաց, որ ինքը բնակիչներին նույնիսկ սեփական տուն է առաջարկել, սակայն նրանք համառորեն չեն համաձայնել, ավելին` եհովայի վկայի կենտրոն են բացել շենքում:
Նունե ԱՐԵՎՇԱՏՅԱՆ
