«Չգիտեմ` իրենք իրենց մեջ ինչ պարտավորություններ ունեն, բայց դրա կրողը մենք ենք` հասարակ ժողովուրդը: Իրենց ցանկացած քմահաճույքի համար պարտավոր ենք աշխատել ու այնպես անել, որ իրենք լավ ապրեն»,- ասաց հաղորդավարուհի Լուսինե Բադալյանը` (Լուլուն), որը այսօր «ՀայՌուսգազարդի» 20% բաժնեմասը ՌԴ-ին ` Հայաստանի 300 միլիոն դոլար պարտքի դիմաց հանձնելու համաձայնագրից բողոքող քաղաքացիներին էր միացել:
Նա նաեւ ասաց, որ ինքն ու բողոքի ակցիայի շատ մասնակիցներ այսօր ԱԺ-ի դիմաց են հավաքվել ոչ թե հայ-ռուսական համաձայնագրի դեմ բողոքելու, այլ. «Սա էլ է խորամանկ քայլ: Այսօր դեմ ենք կենսաթոշակայինին, վաղը դեմ ենք «Գազպրոմին», մյուս օրը այսինչ պայմանագրին: Իրականում դրվագված պայքարը շատ սխալ է, վաղուց պետք է հասկանանք, որ համակարգի դեմ պետք է պայքարենք… իրեն չարդարացրած կառավարությունը բարեփոխումներ անելու բարոյական իրավունք չունի: Թող եղած վիճակը կարգի բերեն, դրանից հետո անցնեն բարեփոխումների»:
Նա նաեւ ասաց, որ Հայաստանում իշխանափոխություն է պետք. «Թող լինի իշխանափոխություն, իսկ եթե չի լինելու, թող կարգի հրավիրեն իրենց… ես միշտ վախենում եմ իշխանափոխություն ասելուց, որովհետեւ այլընտրանք էլ չեմ տեսնում»:
Արփինե ՍԻՄՈՆՅԱՆ
