ԱԺ արտահերթ նիստը, որ ընդհատվեց 12.34 րոպեին, վերսկսվեց 15.32 րոպեին: Այդ երեք ժամը հարկավոր էր, որպեսզի «Ավտոմոբիլային տրանսպորտի մասին» Հայաստանի Հանրապետության օրենքում փոփոխություններ եւ լրացումներ կատարելու մասին օրենքը եւ դրան հարակից փաթեթը կարողանային դնել քվեարկության:
Մինչ քվեարկությունը՝ ԱԺ նախագահը հայտարարեց, որ հաշվիչ հանձնաժողովի նախագահ Սուքիաս Ավետիսյանից ստացել է գրություն առ այն, որ գազային փաթեթի քվեարկության հաշվարկի ժամանակ ձայները հաշվելիս թյուրիմացություն է պատահել՝ կրկնակի անգամ են հաշվարկել նախագահության երեք անդամներին եւ երկու անկախ պատգամավորներին: Այնպես որ, ոչ թե 77, այլ 72 հոգի է կողմ քվեարկել գազային փաթեթին:
Մնացածը կատարվեց հաշված վայրկյանների ընթացքում: ԱԺ նախագահը տեղեկացրեց, որ «մեր գործընկերը չի վերադարձրել մեր քարտերը», հետեւաբար պետք է քվեարկեն ձեռքերը բարձրացնելով: «71 կողմ, դեմ -ձեռնպահ չունենք» կարգախոսով քվեարկվեցին 2013 թ. պետական բյուջեում փոփոխություններ կատարելու եւ «Հայռուսգազարդին» արտոնություններ տալու մասին, ավտոմոբիլային տրանսպորտի մասին օրենքների նախագծերը:
Արտահերթ նիստը արագորեն համարեցին փակված, իրենք իրենց ծափահարեցին ու լքեցին մեծամասնաբույր դահլիճը:
Կարդացեք նաև
Մելանյա ԲԱՐՍԵՂՅԱՆ
