«Պրոֆեսիոնալ հանցագործները իշխանության լավագույն գործընկերներն են: Հանցագործ աշխարհը ոչ ժողովրդավար իշխանության գործիքն է: Ես մեկ տարի եղել եմ «Նուբարաշեն» ՔԿՀ խցերում, ես այլ երկրի քաղաքացի՝ Մարդու իրավունքների պաշտպանության վիճակով վատ դիրքերում գտնվող Իրանի քաղաքացի, որեւէ այլ օժանդակություն չունեի, կարող եմ ասել, որ անպաշտպան էի, որքան ՀՀ քաղաքացիները»,- այսօր Հայաստանի Հելսինկյան կոմիտեի կողմից կազմակերպված Հայաստանի ՔԿՀ-ների ներքին կյանքի ուսումնասիրման արդյունքների հրապարակման ժամանակ ասաց Վարդգես Գասպարին:
Հելսինկյան կոմիտեի նախագահ Ավետիք Իշխանյանը ներկայացնելով «Կյանքը ՔԿՀ-ներում» զեկույցը, ասաց, որ ավելի վատացել է ազատազրկվածների վիճակը, նրանք խուսափում են խոսել եւ նաեւ նկատեց, որ երկու քաղաքացի են թերեւս անկաշկանդ համագործակցել դիտորդական մարմնի հետ, ներկայացրել ՔԿՀ-ի վիճակը եւ երկուսն էլ եղել են ոչ ՀՀ քաղաքացի՝ Սարգիս Հացպանյանն ու Վարդգես Գասպարին:
Իրավաբան Ռոբերտ Ռեւազյանը նշեց, որ ուսումնասիրության ժամանակ ազատազրկվածների ճնշող մեծամասնությունը նշել է, որ ՔԿՀ-ներում արտոնյալ պայմաններում են միայն հեղինակությունները:
Կարդացեք նաև
Ճնշող մեծամասնությունը նշել է, որ տեսակցությունները տրվում են ամիսը մեկ անգամ, դատապարտյալները հրաժարվում են տեսակցություններից, քանի որ ընտանիքների ֆինանսական վիճակը լավ չէ:
33 հարցվածներից 20-ը ի՞նչ հաճախականությամբ եք լոգանք ընդունում հարցին պատասխանել է՝ շաբաթը մեկ անգամ, 8-ը պատասխանել է՝ 10-15 օրը մեկ անգամ, 1-ը՝ ամիսը 1 անգամ, բայց պետք է գումար ունենաս: Ի դեպ, ազատազրկվածները հիգիենայի պարագաներ հիմնականում ստանում են դրսից: Մեկը պատասխանել էր, որ ամիսը մեկ անգամ հնարավոր է սեւ օճառ տային:
«Սնունդը եթե դրսից չբերվի, կալանավորները կմահանան, ասել են 33 հարցվածները, որոնցից 22-ը դժգոհել է «շան կեր»՝ սննդի որակից:
Ի դեպ, քննարկմանը չեն մասնակցում ինչպես արդարադատության նախարարությունից, այնպես էլ չի մասնակցում արդարադատության նախարարը:
Քննարկումները շարունակվում են:
Մանրամասները՝ ավելի ուշ:
Ռուզան ՄԻՆԱՍՅԱՆ
Ռուզ ջան, ուշացումով եմ սա տեսնում… ցավոք անճշտություններ կան…
1 – Հանցագործ աշխարհը ոչ ժողովրդավար հասարակության գործիքն է:
Ոչ թե հասարակության , այլ՝ իշխանության.
2 – Ես ազատազրկման ժամանակ ոչ թե Իրանի , այլ՝ ՀՀ քաղաքացի եմ եղել…
Շնորհակալություն
Հարգելի Վարդգես
Մի ուղղումն արեցի: Մյուսի դեպքում ամբողջ համատեքստը փոխվում է: Խնդրում եմ՝ Ռուզանի հետ որոշեք, թե այդ մասն ինչպես պետք է փոփոխվի: Գուցե ընդհանրապե՞ս հանվի: