Իշխանությունների մոտ ցանկություն չկա ժողովրդի հետ խոսելու: Այսօր՝ դեկտեմբերի 23-ին «Բլից ինֆո» մամուլի ակումբում հայտարարեց «Հայկական սոցիոլոգիական ասոցիացիայի» նախագահ, սոցիոլոգիայի դոկտոր, պրոֆեսոր Գևորգ Պողոսյանը: Այս իրավիճակը պայթյունավտանգ է, ըստ պարոն Պողոսյանի, ինչը կարող է պատճառ դառնալ իսկական քաոսի: Մարդկանց մեջ տարբեր երեւույթների նկատմամբ դժգոհությունները բացասական տրամադրություններ են առաջացնում, ինչը նրանց կստիպի դիմել պայքարի, ընդվզման, նույնիսկ ագրեսիայի, ինչը նույնիսկ իշխանություններին ձեռնտու չէ:
Պարոն Պողոսյանը նշում է, որ իշխանություն ասելով՝ նկատի ունի նաեւ ընդդիմությանը, եւ որպեսզի իրավիճակը մեղմանա, նրանք պետք է բանակցեն, խոսեն ժողովրդի հետ, նախապատրաստեն որոշ փոփոխությունների:
Սոցիոլոգը օրինակ է բերում պարտադիր կուտակային ֆոնդի ներմուծումը, ասում է, իշխանությունները նախօրոք պետք է հասարակության հետ խոսեին, տեղեկացնեին երեւույթի մասին, իսկ Ռուսաստանի հետ գազի սակագնի մասին պայմանագրի ստորագրման որոշումը համարում է «ձախողված», կարծում է՝ պայմանագիր կնքողները նույնիսկ տեղյակ էլ չեն եղել պայմանագրին:
Ըստ սոցիոլոգի՝ իշխանությունը, զուգահեռ մի քանի գործընթացներ ստեղծելով, նպատակ ունի հասարակությանը շեղելու եւ ապակենտրոնացնելու, սակայն ամեն դեպքում բացասականը մարդկանց մեջ կուտակվում է, եւ ռումբի պայթյունը անխուսափելի է դառնում: Պայթյունավտանգ իրավիճակը իր հետ մեկ այլ բացասական ալիք է բարձրացնում. ժողովուրդը հիասթափվում է եւ արտագաղթում երկրից. «Մեկնում են նրանք, ովքեր աշխատանք չունեն, եւ նրանք, ովքեր հիասթափվում են: Գոնե երկրորդ ալիքը կարող է կանխվել»,- ասում է պարոն Պողոսյանը: Նա ամեն դեպքում առաջարկում է, որ հասարակությունն ավելի ակտիվ լինի, պայքարող լինի:
Կարդացեք նաև
Ամփոփելով անցնող տարին՝ Գեւորգ Պողոսյանն ասում է. «Շատ բարդ տարի էր, նախագահական ընտրություններ եւ այլն: Ավարտում ենք այն ակնկալիքով, որ իշխանությունները ուշադիր կլինեն ժողովրդի նկատմամբ»:
Հռիփսիմե ՀՈՎՀԱՆՆԻՍՅԱՆ
