Ըստ «Ազատություն» ռադիոկայանի, պարսկերենից կամ թուրքերենից սլավոնական լեզուներ դարեր առաջ ներմուծված «մայդան» բառը ներկայիս Ուկրաինայում դարձել է քաղաքական պայքարի խորհրդանիշ։
«Մայդան»-ի երեք նպատակները
Եվրաինտեգրման շարժման կողմնակիցների ցույցերը տեղի են ունենում Կիևի Մայդան Նեզալեժնոստիում` Անկախության հրապարակում։ Իսկ երեկվանից այդ հասկացությունը պաշտոնապես հաստատվել է Ուկրաինայի քաղաքական կյանքում։
Ընդդիմության ջանքերով գումարված համաժողովրդական «վեչեն» (հանրահավաքը) որոշել է ստեղծել նոր միավորում` «Մայդան»։
Կարդացեք նաև
Ուկրաինայի ներքին գործերի նախարարության տվյալներով՝ «վեչեին» մասնակցել է մոտ 12 հազար մարդ, ընդդիմությունը պնդում է, որ մասնակիցների թիվը շատ ավելի մեծ էր։
Ընդդիմությունը ստեղծում է «Մայդան», որի քաղաքական օրակարգն անցած շաբաթների ընթացքում ձևավորվել և բարձաձայնվել է Մայդան Նեզալեժնոստիի բազմահազարանոց ցույցերի ընթացքում։
«Մայդան»-ը, որին միանում են ընդդիմադիր քաղաքական կուսակցություններն ու հասարակական կազմակերպությունները, հետապնդելու է երեք նպատակ` գործող կառավարության հրաժարական, արտահերթ ընտրությունների անցկացում և Սահմանադրության փոփոխություն։
«Մայդան»-ի խորհրդի կազմում են «Բատկիվշչինա» կուսակցության ղեկավար Արսենի Յացենյուկը, ՈւԴԱՌ կուսակցության ղեկավար Վիտալի Կլիչկոն, «Ազատություն» կուսակցության ղեկավար Օլեգ Տյագնիբոկը, 7-ամյա ազատազրկման պատիժը կրող նախկին վարչապետ Յուլիա Տիմոշենկոն, ներքին գործերի նախկին նախարար Յուրի Լուցենկոն, արտաքին գործերի նախկին նախարար Բորիս Տարասյուկը, գործարար և քաղաքական գործիչ Պետր Պորոշենկոն, Գերագույն ռադայի ընդդիմադիր պատգամավորներ, ընդդիմադիր հասարակական կազմակերպությունների ներկայացուցիչներ։
«Բատկիվշչինա»-ի ղեկավարներից Ալեքսանդր Տուրչինովն ասել է, որ «ամբողջ Ուկրաինան պետք է դառնա մեծ մայդան»։
Յացենյուկի պնդմամբ՝ «Մայդան»-ին պետք է միանան «բոլոր նրանք, ովքեր Ուկրաինայի ապագան տեսնում են Եվրոպայում»։
ՈւԴԱՌ կուսակցության ղեկավար, աշխարհահռչակ բռնցքամարտիկ Վիտալի Կլիչկոն առաջարկել է «Սուրբ Ծնունդն ու Ամանորը տոնել Մայդանում»։
Նախագահ Վիկտոր Յանուկովիչի առաջնորդած Ռեգիոնների կուսակցությունը մտադիր է ավարտել զանգվածային հավաքները, որոնք Անկախության հրապարակից ոչ հեռու` Մարիինսկի այգում է անցկացնում։
Մավրն արե՞ց իր գործը…
«Մենք մեր խնդիրը համարում ենք լուծված, մեր աջակցությունը Յանուկովիչին տվել է անհրաժեշտ արդյունքը, Մոսկվայում նրա ստորագրած համաձայնագրերը կխթանեն Ուկրաինայի տնտեսությունը և կպահպանեն աշխատատեղերը», – ԻՏԱՌ-ՏԱՍՍ-ի թղթակցին ասել է «Ուկրաինայի համազինվորական միության» նախագահ, Գերագույն ռադայի պատգամավոր Օլեգ Կալաշնիկովը։
Մինչդեռ, Մայդանի ակտիվիստները հավատացնում են, որ կշարունակեն պայքարը։
Վոլոդիմիրը, ով ունի 4 զավակ և 7 թոռ, «Ազատություն» ռադիոկայանի ուկրաինական ծառայության թղթակցին ասել է, որ Մայդանում պաշտպանում է Եվրոպայի գաղափարը, քանի որ Եվրոպայում նախագահը և շարքային քաղաքացին հավասար են օրենքի առաջ։
Սերհի անունով ակտիվիստն էլ ասել է, որ «հիմա սկսվում է պայքար ոչ թե Եվրոպայի համար, այլ Յանուկովիչի, նրա կուսակցության և խորհրդարանի դեմ, ինչից հետո Ուկրաինան կկնքի գործարքը Եվրոպայի հետ»։
Արմեն Քոլոյան
