«Միջազգային պայմանագրերի կնքումն ապահովող անձինք եւ նրանց վավերացման օգտին քվեարկող Ազգային ժողովի պատգամավորները քրեական պատասխանատվության պետք է ենթարկվեն, ոչ միայն որպես հայոց ժողովրդի իշխանությունը յուրացրած հանցավոր կազմակերպության անդամներ, այլեւ՝ որպես հայրենիքի դավաճաններ»,- մինչ «Նախախորհրդարանի» ամենշաբաթյա իրազեկման երթի սկսվելը հայտարարեց Վարուժան Ավետիսյանը։
Նա մարդկանց կոչ արեց օր առաջ միանալ իրենց, իսկ իրենց հայրենիքի ծառա համարող պատգամավորներին հորդորեց հրաժարվել գաղութացման ու ցեղասպանության գործիքի վերածված պետական կառավարման համակարգին իրենց կապող պատգամավորական մանդատներից եւ համախմբվել ու ձեւավորել ազատագրական մարմինը՝ հիմնադիր խորհրդարանը։ Իսկ գործող վարչախմբի հաստատված միջազգային պայմանագրերը չեղյալ են հայտարարվելու ինչպես Հայաստանում, այնպես էլ Լեռնային Ղարաբաղում։
Ամենշաբաթյա երթերը յուրաքանչյուր շաբաթ ունենալու են իրենց կոնկրետ կազմակերպիչը, ով ղեկավարելու է այդ շաբաթվա երթը։ Այս շաբաթվա պատասխանատուն էր Եղիա Ներսեսյանը, ով խնդրեց ներկաներին քայլել կազմավորված. «Փորձելու ենք քայլել կազմակերպված, ովքեր բռնել են ցուցանակները քայլում են դեպի փողոց, ցուցանակը շուռ տված դեպի մեքենաները, որպեսզի անցնող մարդիկ տեսնեն։ Քայլում ենք չորս-չորս, չենք քայլում ինքնաբուխ, այսինքն՝ դասակի նման շարվում ենք»։
«Նախախորհրդարանի» անդամ Տիգրան Խզմալյանը Aravot.am-ի հետ զրույցում նշեց, որ պետք է մարդկանց խումբ գտնել, ովքեր իրենց վրա կվերցնեն պատասխանատվությունը եւ որոնց ժողովուրդը կվստահի. «Մենք պարտավոր ենք անել այն ամենը, ինչ պարտավոր է անել մտավորականությունը, մտավոր ականները, մարդիկ ովքեր պատրաստ են կյանքով վճարել իրենց սկզբունքների, համոզմունքների համար»։
Կարդացեք նաև
Ամի Չիչակյան
