Ամանորյա սեղանին լինելու է իր կնոջ պատրաստած սացիվին
«Եթե բուդ առնեմ` կոկորդիլոս էլ կառնեմ»,- այսպես արձագանքեց ՀՀԿ-ական պատգամավոր Վարդան Այվազյանը մեր հարցին` պատրաստվո՞ւմ է իր կուսակից ընկերոջ` Արտակ Սարգսյանի ներկրած կոկորդիլոսով զարդարել իր ամանորյա սեղանը: SAS սուպերմարկետներում, որոնք պատկանում են ՀՀԿ-ական պատգամավոր Արտակ Սարգսյանին, հայտնված կոկորդիլոսները Հայաստանում բուռն քննարկումների տեղիք են տվել: Ի դեպ, երեկ «Առավոտի» հետ զրույցում պատգամավորն ասաց, որ օրերս 12 կոկորդիլոս էլ կներմուծի Հայաստան: Դրանք նախօրոք պատվիրված են: Պատվիրատուների անունները պատգամավորը չհրապարակեց:
Ամանորյա սեղանի շուրջ Վարդան Այվազյանի հարցուպատասխանը ներկայացնում ենք առանց մեկնաբանությունների.
– Դուք Ձեր ամանորյա սեղանին ընդհանրապես բուդ չե՞ք դնում:
– Ոչ:
Կարդացեք նաև
– Հայկական սեղաններին ընդունված է բուդ դնել:
– Նայած հայկական սեղան:
– Հայավարի չե՞ք դիմավորում Ամանորը:
– Ինքնավարի եմ անում, այվազյանական եմ անում:
– Դա ո՞րն է:
– Մեր տուն հյուր կկանչեմ` կգաս, կտեսնես: Հիմա ես ո՞նց բացատրեմ, թե չարազը ո՞նց ենք դնում… ասենք՝ դրա տեղը սացիվի կարող ա դրվի:
– Սացիվին Ձեր տիկի՞նն է պատրաստում:
– Ինչի՞, մտածում ես, ես տիկնոջս առել եմ մենակ նայելու համա՞ր: Տիկինս` տիկին ա, նորմալ տիկին ա:
– Համե՞ղ է պատրաստում, Դուք գո՞հ եք իր պատրաստածից:
– Հա, ոնց կարող ա գոհ չըլնեմ: Գոհ չըլնեմ էլ` սովորած կըլնեմ արդեն:
– Հիմա սեղանին կոկորդիլոս դնելո՞ւ եք:
– Չէ, կոկորդիլոսի հետ չունեմ: Ամենակարեւորը գիտե՞ք որն ա. տալիս եք հարցեր, որի մասին մենք տեղյակ չենք ու մենք փորձում ենք պատասխաններ գտնել այն բանի մասին, որը դուք ավելի լավ գիտեք:
– Դուք խանութ, մասնավորաբար, SAS սուպերմարկետ չե՞ք մտնում:
– Մտնում եմ, ո՞նց չէ:
– Բա կոկորդիլոսը չե՞ք տեսել:
– Վերջին անգամ «Սիթի» եմ մտել, մեկ էլ մեր ճանապարհին մի հատ խանութ կա, ըտեղ եմ մտել, ֆիրման չեմ հիշում որն ա: Ես խանութների միջեւ առանձնահատկություններ չեմ դնում: Որ անհրաժեշտության ապրանք ա լինում` առաջին իսկ պատահած խանութն էլ մտնում եմ:
– Տան համար անհրաժեշտ առեւտուրը Դո՞ւք եք անում:
– Նորից ասեմ` կնոջս միայն նայելու համար չեմ բերել:
Ն. ԳՐԻԳՈՐՅԱՆ
«Առավոտ» օրաթերթ
