ԲՀԿ խմբակցության պատգամավոր Տիգրան Ուրիխանյանը այսօր ՀՀ էներգետիկայի նախարարից, ով ներկայացնում էր «Հայռուսգազարդի» բաժնետոմսերի՝ ՀՀ կառավարությանը պատկանող 20%-ի վաճառքի վերաբերյալ համաձայնագիրը խորհրդարանում, հետաքրքրվեց, թե արդյո՞ք Իրանի դեսպանի ասածը, որ Հայաստանը չի բանակցել Իրանի հետ, եւ եթե բանակցեր, շատ ավելի մատչելի գնով գազ կներկրեինք, ճիշտ է.«Բանակցե՞լ եք, թե՞ ոչ, ո՞վ է ստում»:
Էներգետիկայի նախարար Արմեն Մովսիսյանը պատասխանեց.«Այո, Իրանի հետ եղել են բանակցություններ եւ եղել են ոչ մեկ անգամ, առնվազն՝ հինգ անգամ: Մի անգամ ԻԻՀ ԱԳ նախարարի հետ, երկու անգամ նավթի եւ գազի նախարարի հետ, երկու անգամ նավթի եւ գազի փոխնախարարի հետ, որը նաեւ այդ երկրի գազ արտահանող ընկերության տնօրենն է: Իրենց առաջարկությունը եղել է 400$-ից բարձր, այն դեպքում, երբ Ռուսաստանը մեզ սահմանի վրա տալիս է 189$-ով:
Պարոն Ուրիխանյանը հետաքրքրվեց նաեւ՝ եթե երբեւէ որեւէ երկիր որոշի մատչելի գազ տալ, եւ Հայռուսգազարդի 100 % -ի սեփականատեր Գազպրոմը չհամաձայնի այդ մատչելի գազը բերել, քանի որ իր ձեռքում են մեր գազատարները, բաշխիչ ցանցեր եւ այլն, այդ դեպքում էներգետիկայի նախարարությունը ի՞նչ կարող է անել, ո՞ւմ հետ պետք է բանակցի: Ի դեպ, այս հարցը տարբեր ձեւակերպումներով այլ պատգամավորներ էլ էին տվել: Մասնավորապես, ՀԱԿ խմբակցության ղեկավար Լեւոն Զուրաբյանը ավելի ուտոպիստական տարբերակ էր ներկայացրել՝ «ենթադրենք, մենք լուծում ենք Ղարաբաղի հարցը եւ որոշում ենք գազը գնել ոչ թե Ռուսաստանից, այլ Ադրբեջանից՝ շատ ավելի ցածր գնով» ձեւակերպմամբ:
ՀՀ էներգետիկայի նախարարը պարոն Ուրիխանյանի հարցին պատասխանեց.
Կարդացեք նաև
«Մեր օրենսդրությունն այնպիսին է, որ անկախ նրանից, թե ո՞վ է մատակարարը, Հայռուսգազարդը պարտավոր է բերել ավելի մատչելի գազը»:
Նախարարը նաեւ հերքեց հավանականությունը, որ հնարավոր է Գազպրոմը 2% բաժնեմաս գնի,ասենք, ադրբեջանական «Սոկար» ընկերությունից եւ այդ ընկերությունը դառնա Գազպրոմին փոխկապակցված ընկերություն եւ նրան վաճառի Հայռուսգազարդի բաժնետոմսերի 49%-ը (համաձայնագրով այդպես է նախատեսված, որ Գազպրոմը կարող է օտարել Հայռուսգազարդի բաժնետոմսերի ոչ ավելի քան 49%-ը, այն էլ միայն՝ իրեն փոխկապակցված ընկերությանը, Հայաստանի համաձայնությամբ): Նախարարն ասաց, որ Հայաստանի համաձայնությունը պարտադիր պայման է:
Մելանյա ԲԱՐՍԵՂՅԱՆ
