Գինեգործների միության նախագահ Ավագ Հարությունյանը Aravot.am- ի հետ զրույցում թվելով 2013 թվականի ձեռքբերումները` դրանցից առանձնացրեց հատկապես հետեւյալը. «Տարին հաջողակ էր մի քանի առումներով, նախ կլիմայական պայմաններն էին լավը, հիմնականում չցրտահարվեցին, չհիվանդացան ծառերը, չկարկտահարվեց բերքը եւ մենք ստացանք լավ բերք թե քանակով, եւ թե որակով: Երկրորդ առանձնահատկությունն էլ` հայկական գինու արտահանումների քանակի բարձրացումն էր, այսինքն`11 ամսվա կտրվածքով ունեցանք 70 տոկոս արտահանման աճ: Իսկ երրորդ առանձնահատկությունը հետեւյալն էր` պետությունն առաջին անգամ հովանավորեց եւ մենք մասնակցեցինք երկու ցուցահանդեսի ու մեկ համտեսի Մոսկվայում` Երեւանի օրերի շրջանակներում»:
Ավագ Հարությունյանը ավելացրեց, որ այս տարի ոսկե մեդալ են ստացել Եվրոպական կարեւոր մրցույթ-համտեսում, ինչը առանձնահատուկ փաստ համարեց ու մեծ ցուցանիշ:
Ավագ Հարությունյանի խոսքով`անցնող 2013 թվականի ընթացքում կոնյակի առումով 10 տոկոսի նվազում է եղել, սակայն արժեքով նույնքան աճ է արձանագրվել դարձյալ 11 ամսվա կտրվածքով:
Ավագ Հարությունյանը նշում է․ «Տարին վատ էր, որ տեղական արտադրանքը սկսեցին 10 տոկոսով պակաս խմել, քան արտասահմանյան խմիչքները: Ամեն տարի, երբ մեկը պակասում էր, մյուսը ավելանում էր, բայց, քանի որ ներմուծման ծավալները մոտավորապես նույնն էին, ուրեմն ստացվեց, որ կյանքն է վատացել, կամ` արտագաղթը շատացել, դրա համար էլ ներքին շուկայում հայկական արտադրանքի սպառումը այդքան քիչ էր: Տարին վատ էր, որովհետեւ պետությունը ոչինչ չարեց, որ սուպերմարկետները եւ մեծ խանութները կարողանան ողջամիտ ժամկետներում փողերը հետ վերադարձնեն եւ հանցավոր կրեդիտային համակարգը մի քիչ նվազի»:
Կարդացեք նաև
Չնայած վերոնշյալ խնդիրներին, Ավագ Հարությունյանը վստահեցրեց, որ 2013 թվականի ընթացքում դրականն ավելի շատ էր, որովհետեւ նախ ավելացան գործարանների, այգիների թիվը, եւ բարձրացավ խաղողի գինը:
Եվա ՀԱԿՈԲՅԱՆ
