ԲՀԿ խմբակցության քարտուղար Նաիրա Զոհրաբյանը ՀՀ էներգետիկայի նախարար Արմեն Մովսիսյանին սպառնաց, որ նրան եւ կառավարության մյուս ներկայացուցիչներին սպասվում է Ուկրաինայի նախկին վարչապետ Յուլյա Տիմոշենկոյի ճակատագիրը՝ քրեական պատասխանատվություն:
Նա Արմեն Մովսիսյանին հարցրեց, արդյո՞ք հասկանում է վասալի եւ ռազմավարական գործընկերոջ տարբերությունը, քանի որ այս՝ «ՀայՌուսգազարդի» 20%-ը Ռուսաստանին վաճառելու մասին համաձայնագիրը՝ կնքված ՀՀ եւ ՌԴ կառավարությունների միջեւ, որ բերվել էր Ազգային ժողովի հաստատմանը, վասալային պայմանագիր է:
Արմեն Մովսիսյանը պատասխանեց. «Ուշադիր կարդացեք, կտեսնեք՝ վասալային պայմանագիր չէ»:
Մեկ այլ ԲՀԿ-ական պատգամավոր Միքայել Մելքումյանը նկատեց, որ այս համաձայնագիրը հակասության մեջ է Հայաստանի բազմաթիվ օրենքների հետ: Եվ մասնավորապես, օրենքը պահանջում էր, որպեսզի օտարման ենթակա գույքի ցուցակով մտներ Ազգային ժողով, հաստատվեր Ազգային ժողովի կողմից:
Կարդացեք նաև
Նա նաեւ պնդեց, որ չի կարծում, թե սա հաջողված գործարք է, ինչի մասին ակնարկում էր ՀՀ էներգետիկայի նախարարը, քանի որ Էներգետիկայի նախարարը մինչ այդ ասել էր, որ մեր պարտքը Գազպրոմին պետք է հաշվարկվեր 1,1 մլրդ դոլարից ավելի, սակայն բանակցությունների արդյունքում հաշվեցին 300 մլն դոլար: Մ. Մելքումյանը նկատեց, որ 300 մլն դոլարը մեր ողջ բնակչության՝ մեկ տարվա գազի սպառման ծավալն է:
Արմեն Մովսիսյանի պատասխանը. «Եթե օտարման ցանկում լիներ՝ այսօր չէինք բերի Ազգային ժողով: Չկար ցանկում, որովհետեւ դեռ չէինք բանակցել վերջացրել, չգիտեինք 20%-ի մասին դեռ ոչ մի բան: Իսկ 1,1 մլրդ դոլար պարտքը մինչեւ 2018 թվականը պետք է առաջանար»:
Մելանյա ԲԱՐՍԵՂՅԱՆ
Տեսանյութը՝ a1plusnews–ի
