ԲՀԿ խմբակցության պատգամավոր Վարդան Օսկանյանի հարցը՝ ՀՀ էներգետիկայի նախարար Արմեն Մովսիսյանին, որը Ազգային ժողովում ներկայացնում էր ՀՀ եւ ՌԴ կառավարությունների միջեւ կնքված «ՀայՌուսգազարդի» բաժնետոմսերի առքուվաճառքի վերաբերյալ համաձայնագիրը, հետեւյալն էր. «Մենք իրար հետ տարիներ աշխատել ենք, հաճախ ենք բարդ իրավիճակներում գտնվել, բայց մի սկզբունք է եղել. հնարավոր է իրականությունը չասել, բայց կարեւորն է՝ չստելը: Ես ուզում եմ հավատալ, որ հիմա էլ է դա արվում, եւ պետք է անկեղծ լինենք պատգամավորների, բայց ամենակարեւորը՝ հայ ժողովրդի հետ:
Ես ինքս ինձ խաբված եմ զգում: Միգուցե դուք փորձեք ինձ հակառակում համոզել, բայց դուք անձամբ այստեղ բազմաթիվ անգամ հերքել եք, ասել եք, որ Հայաստանի համար գազի գինը չի բարձրացել, բայց հիմա պարզվում է, որ տարիների ընթացքում Հայաստանը պարտք է կուտակել, որի կեսը Ռուսաստանն է տալիս, մյուս կեսը՝ մենք: Ամբողջ խնդիրն այն է, որ մենք պարտք ենք կուտակել, դա նշանակում է, որ Ազգային ժողովը պետք է այդ պարտքի կուտակմանը հավանություն տար, բայց դուք չեք եկել եւ չեք ներկայացրել այդ պարտքի մասին, հակառակը, դուք հերքել եք, որ գինը բարձրացել է, իսկ հիմա եկել եք եւ ասում եք, որ վավերացնենք: Դուք ուզում եք, որ մենք մասնակից դառնանք մի գործարքի, որը թաքցրել եք»:
Պարոն Մովսիսյանը պատասխանեց. «Ես չեմ ասել, որ գազի գինը չի բարձրացել, ես ասել եմ, Հայաստանում գինը չի բարձրանալու, ես երբեք չեմ հայտարարել ուրիշ բան: Այո, այն ժամանակ խնդիր դրվեց, որ գինը պետք է բարձրանա, բայց դեռ պարզ չէր՝ ինչքան, եւ մենք պայմանավորվեցինք, որ Հայաստանում կսպառենք եղած գնով՝ մինչեւ բանակցությունները ավարտվեն , վերջնական համաձայնության գանք: Երբ որ վերջնական համաձայնության եկանք, հաշվեցինք եւ արդեն եկանք ձեզ ասեցինք: Պարտքը կուտակվել է 2011 թվականից, բայց, թե ինչ պետք է իրենից ներկայացներ այդ պարտքը, միայն բանակցությունների ավարտին կարելի էր իմանալ: Բանակցությունների ավարտից հետո պարզ դարձավ, որ պարտքը 300 մլն է, բայց կեսն իր վրա է վերցնում Ռուսաստանը, մենք էլ մեր կեսը փակվում ենք այդ 20%-ով»:
Մելանյա ԲԱՐՍԵՂՅԱՆ
Կարդացեք նաև
Տեսանյութը՝ a1plusnews-ի
