«Ժառանգություն» կուսակցության քարտուղար Ստյոպա Սաֆարյանի գնահատմամբ, այսօր կառավարությունը ԱԺ հաստատմանն է ուղարկել ստրկացման երեք պայմանագիր:
«Այս իշխանությունների օրոք, հատկապես 2011 թվականից սկսած, Հայաստանից իշխանությունը մաս -մաս ու ահռելի չափերով վերցնում են… մինչեւ 2043 թվականը, Հայաստանը ոչ մի կերպ չի կարողանա փոխել խաղի կանոնները Ռուսաստանի հետ էներգետիկ չակերտավոր համագործակցության ոլորտում»,- ասաց պարոն Սաֆարյանը:
Նա նույնպես այսօր ԱԺ-ի դիմաց «ՀայՌուսգազարդ»-ի 20 տոկոս բաժնեմասը ՌԴ-ին՝ մեր երկրի ունեցած 300 մլն դրամ պարտքի դիմաց hանձնելու համաձայնագրից դժգոհող խմբին էր միացել:
Նրա խոսքով, Հայաստանն ու Ռուսաստանը համագործակցում են «ՀայՌուսգազարդի» գործունեությունը ծաղկեցնելու համար. « Չեմ կարող ընդունելի համարել նման գաղութատիրական եւ ստրկացուցիչ պայմանները: Շատերն են խոսում հայ-ռուս ժողովրդի բարեկամության մասին, եթե իմ եղբայրը գա իմ տուն, տեսնի, որ պարտք ունեմ եւ դրա դիմաց վերցնի իմ տան գույքը, ինձ այդպիսի եղբայր պետք չէ: Ինձ ռուս ժողովրդի հետ նման եղբայրություն պետք չէ»:
Կարդացեք նաև
Նա դատապարտեց նաեւ ՍԴ-ի երեկվա որոշումը` դրական կարծիք տալ հայ-ռուսական համաձայնագրին. «Երեկ Գագիկ Հարությունյանը մթության քողի տակ իր խմբակի հետ Հայաստանի Սահմանադրությանը համապատասխան է գնահատել այս պայմանագրերը: Սա արդեն որերորդ վտանգավոր դեպքն է, որ իրավաբանի կրթություն եւ դիպլոմ ունեցող մարդկանց կողմից ոտնահարվում է Սահմանադրության առաջին հոդվածը, որն ամրագրում է, որ Հայաստանն անկախ, ինքնիշխան պետություն է»:
Պարոն Սաֆարյանը այն կարծիքին է, որ դեռ երեկ էր պետք փողոց դուրս գալ` դատապարտելու ՍԴ քայլերը:
Արփինե ՍԻՄՈՆՅԱՆ
