Այսօր «Peoplemeter» մամուլի ակումբում տեղի ունեցավ «Կաղանդ հայկական ամանորի սեղանը» մշակութային միջոցառման մամուլի ասուլիսը:
Ասուլիսի ընթացքում ավագ խոհարար, «Մենք հանուն ժողովրդավարության» մարդասիրական հասարակական կազմակերպության նախագահ Լևոն Ավագյանը իր խոսքում նշեց, որ «Կաղանդ հայկական ամանորի սեղանը» մշակութային ծրագրի նպատակն է խթանել հայկական մշակույթի զարգացումը, նպաստել հասարակության կողմից մշակույթի, որպես զարգացման միջոցի գիտակցման ամրապնդմանը, ներկայացնել և տարածել հայկական մշակույթն ու ավանդույթները, նոր արժեքներով մատուցել հայկական ավանդական կենցաղը:
Ազգագրագետ Սոնիա Թաշչյանը, խոսելով հայկական ավանդական ամանորյա սեղանի առանձնահատկությունների մասին, առանձնացրեց ծիսական տարեհացը, որը լինում է կլոր կամ ձվաձև, մեծությունը` ըստ ընտանիքի անդամների թվի (20-35 սմ տրամագծով): Տարեհացի երեսը սերմերով և մրգերով զարդարելը ընդհանուր երևույթ է և խորհրդանշում է տարվա հացի և մրգերի առատության գաղափարը: Մեջը դնում են «միջինք» լոբի, սիսեռ, փոքրիկ կորիզ կամ մետաղադրամ: Հայկական ամանորյա սեղանի անբաժանելի մասն են աղանձը, անուշապուրը` եփած ձավարով և մանրացված չրերով, պասուց դոլման, որն իր մեջ պարունակում է 7 տարբեր հատիկներ: Կերակուրը կոչվում է պասուց, քանի որ քրիստոնեական Նոր տարին պահքի օրեր են և պահքը լուծարվում է Հիսուսի ծննդյան տոնին, իսկ 7 հատիկները խորհրդանշում են 7 աստվածային թիվը, որի հիմքում ընկած են աշխարհի 7 տարերքները:
Ասուլիսի ընթացքում բանախոսները ներկայացրեցին նաև «Կաղանդ հայկական ամանորի սեղանը» մշակութային միջոցառման օրակարգը:
Մամլո հաղորդագրություն
