Դեկտեմբերի 2-ին Հայաստանի եւ Ռուսաստանի կառավարությունների միջեւ կնքված «Հայռուսգազարդ» ընկերության բաժնետոմսերի առքուվաճառքի եւ հետագա գործունեության մասին համաձայնագրից դժգոհ մի խումբ ակտիվիստներ այս պահին հավաքվել են Ազգային ժողովի դիմաց՝ իրենց բողոքն արտահայտելու այսօր այն վավերացնելու նպատակով հրավիրված ԱԺ արտահերթ նստաշրջանի դեմ:
Ակտիվիստները սակավաթիվ են եւ պասիվ: Նրանք ձեռքերին կա միայն «Ես չեմ ուզում լինել ստրուկ» ցուցապաստառը: Ակտիվիստները պատրաստվում են առաջիկայում հրապարակել իրենց հայտարարությունը, որով դատապարտում են համաձայնագիրը:
Հայտարարության մեջ մասնավորապես ասվում է. «Հայռուսգազարդ» ընկերության բաժնետոմսերի առուվաճառքի եւ հետագա գործունեության մասին համաձայնագրի վավերացումը Ազգային ժողովի կողմից պետական դավաճանություն է, Հայաստանի ինքնիշխանության կորստի ամրագրում՝ հօգուտ Ռուսաստանի: Բոլոր նրանք, ովքեր կսեղմեն այդ համաձայնագիրը հաստատող կոճակը, համարվելու են պետական դավաճաններ եւ ենթակա են լինելու պետական դավաճանության համար օրենքով սահմանված խստագույն պատժի»:
Արփինե ՍԻՄՈՆՅԱՆ
