Դեկտեմբերի 2-ին «Մենք դեմ ենք Մաքսային միությանը» բողոքի երթի ընթացքում ոստիկանական բաժանմունք տարված երթի մասնակիցները քննարկում են ազատ հավաքներ անցկացնելու իրենց իրավունքը ոտնահարելու համար Ոստիկանության դեմ կոլեկտիվ հայց ներկայացնել: Այս մասին Aravot.am-ին ասաց երթի մասնակից եւ այդ օրը ոստիկանական բաժանմունք տարված Դավիթ Սանասարյանը: Նրա խոսքով, եթե նույնիսկ որոշվի, որ կոլեկտիվ հայց չեն ներկայացնելու, ապա ինքն անպայման բողոքարկելու է իրեն վարչական պատասխանատվության ենթարկելու ՀՀ ոստիկանության որոշումը: Նրա նկատմամբ ՀՀ Ոստիկանությունն առաջադրել է Վարչական իրավախախտումների վերաբերյալ ՀՀ օրենսգրքի 182 եւ 180 հոդվածները:
Դավիթ Սանասարյանը հայտնեց, որ վարչական տույժը վճարելու մասին ՀՀ Ոստիկանության գրավոր որոշումը չի ստացել:
«Չեմ պատրաստվում վճարել վարչական տույժը, որովհետեւ այդ ակցիան եղել է օրենքի սահմաններում: Հավաքի հայտ ենք նախապես ներկայացրել, այն արտոնվել էր, ոստիկանները պետք է մեր անվտանգությունն ապահովեին, հետո, չգիտես ինչու, որոշեցին, որ ակցիան պետք է տեղի չունենա: Չեմ ընդունում, որ ոստիկաններն օրինական պահանջ են ինձ ներկայացրել, ու ես չեմ կատարել կամ էլ խախտել եմ հավաքների ազատության մասին օրենքի որեւէ դրույթ»,- ասաց Դավիթ Սանասարյանը:
Կարդացեք նաև
Արփինե ՍԻՄՈՆՅԱՆ
