«Ամնեսթի Ինթերնեյշընըլ»-ը Ադրբեջանի իշխանություններից պահանջել է արագ և արդարացի դատական գործընթաց ապահովել ընտրությունների մոնիտորինգի և ժողովրդավարության հետազոտությունների կենտրոնի (ԸՄԺՀ) նախագահ Անար Մամմադլիի համար, որը ձերբակալվել է դեկտեմբերի 16-ին:
Բաքվի դատարանը վճռել է, որ Մամմադլին երեք ամիս պետք է նախնական կալանքի տակ գտնվի, մինչև կսկսվի նրա դատը, որտեղ իրեն մեղադրում են «անօրինական ձեռներեցության», «իշխանության չարաշահման» և հարկերից խուսափելու մեջ: Գրում է իրավապաշտպան կազմակերպությունը՝ նշելով, որ ԸՄԺՀ-ի գործունեությունը սկսեցին քննել այն բանից հետո, երբ կազմակերպությունը հոկտեմբերին կայացած Ադրբեջանի ընտրություններում բազմաթիվ խախտումներ էր արձանագրել:
«Տարիների շարունակ Մամմադլին Ադրբեջանում աջակցում է ժողովրդավարությանն ու պաշտպանում մարդու իրավունքները՝ անտեսելով իշխանությունների ճնշումները, որոնք փորձում էին լռեցնել իրեն և իր գործընկերներին», – ասել է Եվրոպայի և Կենտրոնական Ասիայի գծով «ԱԻ»-ի փոխտնօրեն Դենիս Կիրովշեևը:
«Այս ձերբակալությունը Ադրբեջանի իշխանությունների ընտրած ճնշումների քաղաքականության շարքից է, և այդ ճնշումները գնալով ավելի են ահագնանում՝ ստիպելով լռեցնել այլախոհներին», – ասել է Կիրոշեևը և քննադատել Եվրոպայի առաջնորդներին, որ աչք են փակում Ադրբեջանի գործողությունների վրա, քանի որ Մամմադլիին ձերբակալել էին Ադրբեջանի և Եվրոպայի միջև էներգետիկ ոլորտին առնչվող համաձայնագրեր ստորագրելու նախորդ օրը, որին ներկա էր նաև Մեծ Բրիտանիայի արտգործնախարար Ուիլյամ Հեյգը:
Կարդացեք նաև
Պատրաստեց Հովհաննես ԻՇԽԱՆՅԱՆԸ
