«Սերժ Սարգսյանի` իրավական համակարգի մասին աշխարհայացքը, մոտեցումները սահմանափակվում են խփեմ 60,70,80,90, խիարը թարս է աճում, եկել ես, որ ի՞նչ անես շրջանակներում: Նման գաղջ մթնոլորտում ապրելն ու գոյատևելը անհնար է»,-այսօր լրագրողների հետ հանդիպմանը հայտարարեց Հելսինկյան քաղաքացիական ասամբլեայի Վանաձորի գրասենյակի ղեկավար Արթուր Սաքունցը:
Պարոն Սաքունցը, որպես երկրում արդարադատության համակարգի ցուցանիշ` օրինակ բերեց Սուրիկ Խաչատրյանի, «Հարսնաքարի» դատավարությունները և նկատեց. «Նույնիսկ այն կառույցը, որը երկրի անվտանգության հիմնական երաշխավորն է, արժեզրկվեց: Նույնիսկ Վովա Գասպարյանի հրեշտակները չփրկեցին ոչ միայն Վովա Գասպարյանին, այլև իշխանությանը: Հրեշտակները մնացին օդում: Երբ տարեսկզբին մեկ քաղբանտարկյալը` Տիգրան Առաքելյանն ազատ արձակվեց, բայց հետո ունեցանք տասնչորս քաղբանտարկյալներ, որոնք դիմեցին վերջին միջոցին` քաղաքացիական անհնազանդությանը»:
Aravot.am-ը մատնանշելով մարդու իրավունքների պաշտպանի արտահերթ զեկույցը, որտեղ կոնկրետ կաշառքի դեպքեր են ներկայացված և բազում խախտումներ, հետաքրքրվեց՝ հնարավո՞ր է դրվի Կարեն Անդրեասյանի հեռացման հարցը, ինչպես ժամանակին Իշխան Զաքարյանի պարագայում եղավ: Արթուր Սաքունցը ողջունելով զեկույցը պատասխանեց. «Սերժ Սարգսյան և իրավական հասկացությունները համատեղելի են ինչքան կրակն ու ջուրը, ինչքան մահն ու կյանքը: Ինչ վերաբերում է Իշխան Զաքարյանին, ապա ասեմ, որ նա մի քիչ աղմկեց, դոսյեները հավաքեց, ներկայացրեց Սերժ Սարգսյանին: Եթե նախկինում դրանք գաղտնի էին ներկայացնում, հիմա բացահայտ, օրը ցերեկով: Դոսյեները ներկայացրեց ու շարունակեց իր աշխատանքը: Ինչպես ասում են Иванушка слушает, да ест!: Բերեք չհամեմատենք Կարեն Անդրեասյանին ու Իշխան Զաքարյանին: Կարեն Անդրեասյանը իրեն դրեց լուրջ խնդրի առջև, թե ինչպես է նրա ճակատագիրը լինելու, առաջին հերթին երևի ինքը կիմանա: Բայց եթե ինքն իր դիրքորոշումը շարունակի՝ որպես ՄԻՊ, ես կպաշտպանեմ նրան, հենց թեկուզ միայն այդ զեկույցի համար, որի շնորհիվ շատ խնդիրների տրվեց իրավական ուժ»:
Ավետիք Իշխանյանը նույն հարցին արձագանքեց. «Դատաիրավական համակարգը, դատարանները, ոստիկանությունը, դատախազությունը ՀՀ իշխանությունների պահպանման հիմնական հենարանն են: Ինչո՞ւ Արման Դավթյանին խոշտանգելու համար ոչ ոք չի պատժվում, եթե պատժվեց, ուրեմն համակարգը կփլուզվի: Իսկ Կարեն Անդրեասյանին օրենքով որևէ կերպ աշխատանքից հեռացնել չեն կարող, բայց ՀՀ-ում կարող է գործել ահաբեկման, կոմպրոմատների մեխանիզմը: Այդ դեպքում կարող ենք պնդել, որ պետական այդ անկախ կառույցը ոչնչացրին Հայաստանում»:
Կարդացեք նաև
Անդրադարձ կատարվեց նաև բանակում գոյություն ունեցող խնդիրներին: Արթուր Սաքունցը տեղեկացրեց. «Շարունակվում է առողջական լուրջ խնդիրներ ունեցող երիտասարդների զորակոչը, որը հանգեցնում է մահվան դեպքերի: ՊՆ-ն փակ կառույց է և փակում է բոլոր հանցագործությունները, քանի որ պաշպանության բնագավառը նրանց համար եկամտաբեր է: Նրանց համար մահվան դեպքերը էական նշանակություն չունեն, իսկ ցավակցությունները ձևական են: Սեյրան Օհանյանը պաշտպանության բնագավառում քաղաքականության մշակողն է: Զինծառայության կարգուկանոնի պատասխանատուն է գլխավոր շտաբի պետ Խաչատուրովը, ով մնում է ստվերում: Իր սիրուն աչքերի համա՞ր է շարունակում պաշտոնավարել»:
«Լրագրողներ հանուն իրավունքների պաշտպանության» ՀԿ նախագահ Ժաննա Ալեքսանյանը տեղեկացրեց, որ այս տարի 31 զինծառայողի մահվան դեպք է գրանցվել, որից 8-ը ինքնասպանություն է որակված:
Արթուր Սաքունցն այս կապակցությամբ ասաց.«Հավաստիացնում եմ, որ յուրաքանչյուր 10 ինքնասպանության դեպքից 9-ը սպանություններ են, քննությունը չի հիմնավորում, որ դրանք ինքնասպանություն են»:
Ժաննա Ալեքսանյանը հատկապես բացասական գնահատեց ՀՀ ոստիկանության աշխատանքը ու շեշտեց, թե Աշոտ Կարապետյանը չի կարող առանց խոշտանգումների:
Իսկ Արթուր Սաքունցը նշեց, որ հանձինս Վովա Գասպարյանի և Գևորգ Կոստանյանի այս տարի «նվերներ» ունեցանք. «Վովա Գասպարյանը մսագործներին նշանակում է ոստիկանապետ, իսկ Գևորգ Կոստանյանը Հռոմի պապից ավելի կաթոլիկ երևալու ձգտում ունի»:
Ավետիք Իշխանյանը խոսեց ՀՀ-ում գոյություն ունեցող անհանդուրժողականության ու խտրականության մասին, երբ ստեղծվեցին այնպիսի կեղծ կառույցներ, ինչպիսիք են Համահայկական ծնողական կոմիտեն, Երիտասարդական լիգան և այլն: Նա նկատեց, թե «գործում են խորհրդային ժամանակվա մեթոդները, երբ սուտ ԿԳԲ-ն սուտ էր տարածում»:
Տաթև ՀԱՐՈՒԹՅՈՒՆՅԱՆ
