ԱՄՆ դեսպանատունը սույնով տեղեկացնում է, որ Հայաստանը դարձել է ԱՄՆ կառավարության կողմից ֆինանսավորվող Խաղաղապահության նախաձեռնություններին աջակցող GPOI ծրագրի գործընկեր պետություն: Այս նախաձեռնության շրջանակում Հայաստանի խաղաղապահ կարողությունների զարգացման նպատակով Միացյալ Նահանգներն ակնկալում է տրամադրել մոտ 1.5 մլն ԱՄՆ դոլարի աջակցություն 2 տարվա ընթացքում: Նախաձեռնությունը միտված է ամրապնդել ՄԱԿ-ի ու տարածաշրջանային խաղաղապահ գործողություններում ներգրավված գործընկեր պետությունների, ինչպիսին Հայաստանն է, կարողությունները: Այս նոր գործընկերությունը Հայաստանի և Միացյալ Նահանգների սերտ համագործակցության լուրջ ազդակ է, որով կարևորվում ու գնահատվում է Հայաստանի պատրաստակամությունը մասնակցել միջազգային խաղաղապահ գործողությունների Կոսովոյում, Աֆղանստանում և Լիբանանում:
Խաղաղապահության նախաձեռնություններին աջակցող GPOI ծրագիրն ԱՄՆ կառավարության կողմից ֆինանսավորվող աջակցության ծրագիր է անվտանգության ոլորտում, որը նպատակաուղղված է ՄԱԿ-ի ու տարածաշրջանային խաղաղապահ գործողությունների արդյունավետ անցկացման միջազգային կարողությունների մեծացմանը՝ գործընկեր պետությունների խաղաղապահ կարողություններն ուսուցումների միջոցով զարգացնելու ու պահպանելու, տեղակայումների համար պատրաստ զինվորական ու ոստիկանական միավորումների թվի ավելացման, և զինվորական ու ոստիկանական միավորումները տեղակայումներին նախապատրաստելու և նյութատեխնիկական ապահովումը դյուրացնելու ճանապարհով:
Միացյալ Նահանգները գործարկեց GPOI ծրագիրը՝ ի կատարումն Մեծ ութնյակի 2004թ. Սի Այլենդում տեղի ունեցած վեհաժողովում ընդունված Խաղաղապահության միջազգային կարողությունների ընդլայնման գործողությունների պլանի: Սկզբնապես այն նախատեսված էր որպես հնգամյա ծրագիր 2005-2009թթ. համար, սակայն հետագայում որոշվեց այն շարունակել ևս 5 տարի՝ 2010-2014թթ.: Ծրագրի առաջին 5 տարիների կամ առաջին շրջափուլի հիմնական խնդիրն էր 75.000 խաղաղապահների ուսուցումն ու խաղաղապահ գործողություններն իրականացնելու տարածաշրջանային կարողությունների զարգացումը: 2-րդ շրջափուլում ուղղակի ուսուցումներից շեշտադրումը փոխվեց դեպի գործընկեր պետությունների այն ջանքերի աջակցմանը, որոնք ուղղված են տեղում խաղաղապահների ուսուցման ինքնաբավ կարողությունների ձևավորմանը:
GPOI ծրագիրը ֆինանսավորվում է Խաղաղապահ գործողությունների հաշվից, որը տնօրինում է ԱՄՆ պետքարտուղարության ռազմաքաղաքական գործերի գրասենյակը:
Կարդացեք նաև
GPOI ծրագիրը ներկայումս գործակցում է 69 երկրների ու տարածաշրջանային կազմակերպությունների հետ: Այս գործընկերության շրջանակում GPOI ծրագրով իրականացվել են հետևյալ աշխատանքները.
- Աջակցել է միջազգային խաղաղապահ առաքելություններում ընդգրկման ենթակա 228.658 օտարերկրյա զինծառայողների ուսուցմանը և՛ ուղղակի ուսուցումների (176.047 խաղաղապահ), և՛ գործընկեր պետության տեղական ուսումնական կարողություններին օժանդակելու միջոցով (52.611 խաղաղապահ).
- Օժանդակել է խաղաղապահության 45 ազգային ու տարածաշրջանային ուսումնական կենտրոնների, երեք տարածաշրջանային կենտրոնակայանների (Աֆրիկյան Միություն, Արևմտա-աֆրիկյան պետությունների տնտեսական համայնք, և Կենտրոնական Աֆրիկայի պետությունների տնտեսական համայնք), ինչպես նաև ֆինանսական, տեխնիկական և կադրային օգնություն է ցուցաբերել Կայունության ոստիկանական միավորումների գերազանցության կենտրոնին՝ ոստիկանական միավորումների ուսուցանողների ուսուցումն ապահովող կենտրոն, որը ղեկավարվում է Իտալիայի կողմից.
- Աջակցել է 38 երկրներից ներգրավված 180.223 խաղաղապահների տեղակայմանը աշխարհի 25 տարբեր խաղաղապահ գործողությունների շրջանակում: Ներկայումս ավելի քան չորս մայրցամաքների տարածքում ՄԱԿ-ի կողմից իրականացվող 15 խաղաղապահ գործողությունների շրջանակում ներգրավված զինվորական, ոստիկանական ու քաղաքացիական անձնակազմի թիվը կազմում է ավելի քան 116.000 հոգի, ովքեր ներգրավված են 115 տարբեր երկրներից:
ԱՄՆ դեսպանատուն
