«Որ հետխորհրդային տարածքը ՌԴ արտաքին քաղաքականության համար հայտարարվել է առաջնահերթություն, գաղտնիք չէր, եւ փաստորեն, ժամանակը ցույց տվեց, որ այս պահին Վլադիմիր Պուտինը վայելում է թեկուզ մարտավարական, թեկուզ կարճաժամկետ, բայց այնուամենայնիվ, հաղթանակը: Դա իրեն հնարավորություն է տալիս, նաեւ ինքն է իրեն թույլ տալիս նման անբռնազբոս ոճի մեջ վարել իր ասուլիսները»,- Aravot.am-ի հետ զրույցում պատասխանելով մեր հարցին՝ չափազանց ոչ դիվանագիտական եւ կենցաղայի՞ն չէին ՌԴ նախագահի պատասխանները, ասաց «Քաղաքական եւ միջազգային հետազոտությունների հայկական կենտրոնի» փորձագետ Ռուբեն Մեհրաբյանը:
Խոսքը ՌԴ նախագահի այսօր կայացած մեծ մամուլի ասուլիսի մասին է, որը մեկնարկել է 12.00-ին եւ նախատեսվում էր, որ կտեւի չորս ժամ: Նման ձևաչափով ՌԴ նախագահը ասուլիս է տալիս արդեն 9-րդ անգամ՝ սկսած 2001 թվականից։
ՌԴ նախագահի ասուլիսն ընդհանուր առմամբ, մեր զրուցակիցը մեկ բառով է բնութագրում. «Բավական անկեղծ ասուլիս»:
«Ոչ ոք որևէ մեկին չի խեղդել։ Մենք ուղղակի տեսնում ենք, որ Ուկրաինան բարդ իրավիճակում է հայտնվել, և նրան պետք է օգնել»,- այսօր «մեծ մամուլի ասուլիսում» հայտարարել է ՌԴ նախագահ Վլադիմիր Պուտինը՝ պատասխանելով Ուկրաինայի հետ օրերս ստորագրած համաձայնագրերին եւ Մաքսային միությանն անդամակցելու հարցերին: Պուտինն ավելացրել է, որ Ուկրաինայի հետ համագործակցում են՝ ելնելով երկու երկրների եղբայրական հարաբերություններից. «Ուկրաինայում ստեղծված է ծանր տնտեսական իրավիճակ՝ կապված ներքին և արտաքին բարդությունների հետ։ Մենք ընդհանրապես դեմ չենք ասոցացմանը, մենք ուղղակի ասում ենք, որ ստիպված պետք է լինենք պաշտպանել մեր տնտեսությունը։ Մենք Ուկրաինայի հետ համագործակցելու որոշում ընդունել ենք՝ մի կողմից ելնելով մեր առանձնահատուկ հարաբերություններից, մյուս կողմից՝ առաջնորդվելով ուկրաինացի ժողովրդի շահերով և իրատեսական հաշվարկներով»։
Կարդացեք նաև
Արձագանքելով ՌԴ նախագահի այս հայտարարություններին, Ռուբեն Մեհրաբյանը կարծում է, որ հնչած հարցերը որեւէ պատասխան այդպես էլ չստացան եւ ամեն ինչ բացատրվեց եղբայրությամբ. «Բայց բոլորը շատ լավ հասկանում են, որ խոսքը սեփական ազդեցության գոտին պահպանելու ինչ-որ անհասկանալի, կայսերապաշտական մարմաջի մասին է, որը նույնիսկ հակառակ է գնում քաղաքական ռացիոնալիզմին»:
Վրաստանին վերաբերվող ՌԴ նախագահի պատասխանը քաղաքագետը նույնպես դեկլարատիվ է համարում. «Իրենց շուկան չբացելով Վրաստանի առջեւ, փորձում են դա միջպետական հարաբերություններում ճնշման գործոն դարձնել՝ Վրաստանի իշխանության նկատմամբ: Շարունակվում են նաեւ փորձերը՝ փակել Վրաստանի ճանապարհը դեպի եվրաատլանտյան կառույցներ: Մնացած լիրիկական զեղումները՝ եղբայրական ժողովուրդ, հավատակից ժողովուրդ եւ այլն, դրանք քարոզչական նպատակ ունեն»:
Նելլի ԳՐԻԳՈՐՅԱՆ
