«Նորավանք» գիտակրթական հիմնադրամի տնօրեն Գագիկ Հարությունյանն այսօր շարունակվող «Անվտանգությունը եւ համագործակցությունը Հարավային Կովկասում» միջազգային գիտաժողովի ժամանակ, խոսելով Արեւմուտքի եւ Հյուսիսի ինֆորմացիոն պատերազմի մասին՝ հանուն Հարավային Կովկասում հաստատվելու, ասաց, որ ի տարբերություն ռուսական կողմի, որոնք մեզ մոտ ոչ թե ծրագրեր են իրականացնում, այլ՝ միջոցառումներ, արեւմտյան ուժերը համակարգված ծրագրեր են իրականացնում, այդ իսկ պատճառով Հարավային Կովկասում տեղեկատվական դաշտը արեւմտականացված է:
Այս կապակցությամբ նա պատմեց մի հետաքրքիր իրական «անեկդոտ». պարզվում է, մի քանի տարի շարունակ «Նորավանքը» բաժանորդագրվում էր The economist ամսագիրը: Սակայն երկու օր առաջ զանգահարել են այն կազմակերպությունից, որը տեղ էր հասցնում այդ ամսագիրը, եւ տեղեկացրել, որ ամսագիրը որոշել է բաժանորդագրությունից զրկել «Նորավանքը», քանի որ Հայաստանը մտնում է Մաքսային միություն:
Պարոն Հարությունյանի պատմածը զարմանք եւ զվարճություն առաջացրեց ներկաների մոտ, իսկ ոմանք էլ խորհուրդ տվեցին 21-րդ դարում չբաժանորդագրվել, այլ՝ համացանցից քաշել ցանկացած տեղեկույթ: Պարոն Հարությունյանն ասաց, որ իրենք «քաշում են» բազմաթիվ նյութեր, այդ թվում՝ «անթույլատրելի», սակայն դեպքեր են լինում, երբ տպագիր պարբերականը նախընտրելի է. «էլիտան օգտվում է տպագիրից, իսկ ուսանողությունը եւ մյուսները՝ էլեկտրոնայինից»:
Մելանյա ԲԱՐՍԵՂՅԱՆ
