«Դա դեռ ընդամենն առաջարկ է, բայց մենք դրական արձագանքեցինք, քանի որ ցանկանում ենք, որ Հայաստանում ապաստան գտած մեր ընկերները նաեւ ռուսերեն իմանան: Հայաստանում, ռուսերենը բավականին գործածական լեզու է եւ դա նրանց կօգնի իրենց աշխատանքային գործունեության ընթացքում»,- Aravot.am-ի հետ զրույցում ասաց ՍԴՀԿ Հայաստանի վարչության փոխատենապետ Վազգեն Մեսրոպյանը:
Բանն այն է, որ այսօր ՍԴՀԿ Հայաստանի կազմակերպության ատենապետ Նարեկ Գալստյանը, ՍԴՀԿ Հայաստանի վարչության անդամներ Վազգեն Մեսրոպյանը, Հարություն Բալաբանյանը և արտակարգ և լիազոր դեսպանորդ Դմիտրի Մարտիրոսյանը, պաշտոնական հանդիպում են ունեցել ՀՀ-ում ՌԴ դեսպանության դեսպանորդ Անդրեյ Իվանովի և Հայաստանում «Ռոսսոտրուդնիչեստվո»-ի ներկայացուցչության ղեկավարի տեղակալ Իգոր Կուսովի հետ: ՍԴՀԿ մամլո դիվանի տարածած հայտարարության համաձայն. «Կողմերը համատեղ մտահոգություն հայտնեցին Սիրիայում խաղաղ բնակչության՝ հատկապես քրիստոնյաների հանդեպ շարունակվող հետապնդումների և ահաբեկումների վերաբերյալ: Կողմերը փոխադարձ շահագրգռություն ցուցաբերեցին Հայաստանում ապաստանած սիրիահայ մեր հայրենակիցների համար հատուկ ռուսաց լեզվի դասընթացներ կազմակերպելու հարցում»:
Aravot.am-ը պարոն Մեսրոպյանից հետաքրքրվեց` արդյոք ՍԴՀԿ-ում էլ կողմնակից են, որպեսզի ռուսաց լեզվին Հայաստանում հատուկ կարգավիճակ տրվի: «Մենք կարծում ենք, որ Հայաստանում հատուկ կարգավիճակ պետք է ունենա մեկ լեզու` Հայաստանի հանրապետության պետական լեզուն` հայերենը: «Ռոսսոտրուդնիչեստվոն» ռուսաց լեզվի ուսուցանման ծրագրեր է իրականացնում մեր երկրում, առաջարկն էլ եղել է ներկայացուցչության ղեկավարի տեղակալ Իգոր Կուսովի կողմից: Եվ ես արդեն ասացի, թե ինչ պատճառով ենք կողմ այդ առաջարկի` կյանքի կոչմանը»:
Հանդիպման ընթացքում ՍԴՀԿ ատենապետ Նարեկ Գալստյանը նաեւ ներկայացրել է Հայաստանի արտաքին և ներքին քաղաքական հարցերում Հնչակյան կուսակցության դիրքորոշումները և առաջիկա անելիքները: «ՍԴՀԿ ատենապետը ընդգծեց, որ կուսակցությունը Հայաստանում գործում է ձախ դաշտում՝ հանուն սոցիալական արդարության և ընդդեմ առկա մենաշնորհների և օլիգոպոլիայի: Կողմերը հանդիպման ընթացքում փոխանակվեցին կարծիքներով Մաքսային Միությանը Հայաստանի անդամակցության հարցում, ինչպես նաև քննարկվեց իրավիճակը Հարավային Կովկասում և Մերձավոր Արևելքում՝ հատկապես Սիրիայում»,-ասված է ՍԴՀԿ դիվանի տարածած հայտարարության մեջ:
Կարդացեք նաև
Նելլի ԳՐԻԳՈՐՅԱՆ
Ափսոս են մեր Սիրիահայ եղբայրները, թողեք որ մեր մեջ նրանք մաքուր մնան։ Աշխատանքով կամ
կենցաղով ապահովելու համար բոլորովին այլ բան է հարկավոր, որը հանցագործ վառչախմբի ուղեղին հասանելի չէ։