«Արձագանքել իհարկե պետք է, ես կարծում եմ, որ դա խայտառակ որոշում է»,- Aravot.am-ի հետ զրույցում ասաց թուրքագետ Ռուբեն Սաֆրաստյանը, անդրադառնալով Մարդու իրավունքների եվրոպական դատարանի` (ՄԻԵԴ) դեկտեմբերի 17-ին կայացրած որոշմանը, ըստ որի` 1915թ. Հայոց ցեղասպանության ժխտումը համապատասխանում է ազատ խոսքի իրավունքի սկզբունքին:
«Ոնց կարելի է նման որոշում ընդունել, մանավանդ Եվրոխորհրդարանը, որը 1987 թվականին առաջին անգամ ու դրանից հետո էլ մի քանի անգամ վերահաստատել է, որ 15 թվականի իրադարձությունները ցեղասպանություն է եւ դա կապել խոսքի ազատության իրավունքի հետ` սխալ է, որովհետեւ եթե ժխտվում է ցեղասպանությունը, որը ընդունված է Եվրոխորհրդարանի կողմից, ապա նշանակում է հանցագործությունը, որը տեղի է ունեցել, մեր օրերում ժխտողների կողմից հավանություն է ստանում, ինչը վտանգավոր է»,- նշեց Ռուբեն Սաֆրաստյանը, ըստ որի`սա վտանգավոր է ոչ միայն արդարության տեսակետից, որովհետեւ կեղծվում, խաթարվում է այն, այլեւ այն առումով, որ ճանապարհ է բացվում հետագայում ցեղասպանության նոր հանցագործություններ կատարելու համար:
«Անցյալում տեղի ունեցած հրեշավոր հանցագործությունը, ինչպես որ հայոց ցեղասպանությունն է, փաստորեն, դրա ժխտողները դատարանի կողմից հավանություն են ստանում, սա նշանակում է ապագայում այն ուժերը, որոնք նախապատրաստել են ցեղասպանությունը, եւ իրենց ժխտման մեջ հաստատվել, նրանք կստանան մեծ աջակցություն»,- ավելացրեց Ռուբեն Սաֆրաստյանը:
Կարդացեք նաև
Եվա ՀԱԿՈԲՅԱՆ
