Կենտրոն եւ Նորք-Մարաշ վարչական շրջանների ընդհանուր իրավասության դատարան էր դիմել «Հայհիդրոէներգոնախագիծ» ընկերության նախագահ, գործարար Սենիկ Ջուլհակյանը:
Դատարանի այս տարվա հուլիսի 9-ի որոշմամբ հայցվորի պատիվը, արժանապատվությունը, գործարար համբավը վիրավորանքի ձեւով արատավորող արտահայտությունների համար ներողություն խնդրելուն, զրպարտության ձեւով արատավորող տեղեկությունները հերքելուն պարտավորեցնելու պահանջի մասին հայցով պատասխանող է ճանաչվել Հայաստանի քաղաքագետների միության նախագահ Հմայակ Հովհաննիսյանը եւ երրորդ անձ՝ «Առավոտ» օրաթերթը:
Քաղաքագետի ներկայացուցիչն է, ՀՀ փաստաբանների պալատի անդամ Լիաննա Գրիգորյանը, հայցվորինը՝ Գեղամ Այվազյանը:
Դատավոր Կարինե Պետրոսյանի օգնականի գրությամբ նախնական դատական նիստը նշանակվել է գալիք տարվա հունվարի 22-ին, ժ.11.30-ին:
Կարդացեք նաև
Հայցվորը տեղեկացրել էր, որ այս տարվա հունիսի 10-ին Aravot.am-ում հրապարակված հոդվածում Հմայակ Հովհաննիսյանը կատարել է հետեւյալ վիրավորական արտահայտությունը. «նա՝ Սենիկ Ջուլհակյանը (լուսանկարում) Սուրեն Խաչատրյանի փողերը լվացողն է..»:
Հայցվորը զրպարտություն է համարում մի քանի արտահայտություններ, որոնք հնչել են Հմայակ Հովհաննիսյանի կողմից. «Սենիկ Ջուլհակյանն իր սեփական միջոցները չունի…նա իրականում փող չուներ, գրասենյակ չուներ, ոչինչ չուներ…իրականում նա ցանկանում է այդ տարածքն ամեն գնով զավթել, նա չի վճարել մի կանխավճար, որը պարտավոր էր վճարել Հայ համայնքների միության ֆորումի նախագահին…»:
Հայցվոր կողմը դատարանին է ներկայացրել հնարավոր ներողության բովանդակությունը, զրպարտության համար պահանջում է Հմայակ Հովհաննիսյանից գանձել 320 000 ՀՀ դրամ, որպես փոխհատուցման գումար, վիրավորանքի գումարը՝ 280 000 ՀՀ դրամ, դատական ծախսերը՝ 200 000 դրամ:
Ռուզան ՄԻՆԱՍՅԱՆ
