Ուկրաինայի ընդդիմությունը նախագահ Վիկտոր Յանուկովիչից պահանջում է ասել, թե ինչ է խոսք տվել Ռուսաստանին խոշոր տնտեսական կենսաապահովման դիմաց: Գրում է «Բի Բի Սի»-ն:
Ընդդիմության առաջնորդ Վիտալի Կլիչկոն Կիևում հավաքված ցուցարարներին ասել է, որ Յանուկովիչը ծախում է Ուկրաինայի անկախությունը:
«Նա հանձնել է Ուկրաինայի ազգային շահերը, հանձնել է անկախությունը, – ասել է «ՈՒԴԱՌ» կուսակցության առաջնորդը երեքշաբթի օրը, – Յանուկովիչը մեր երկիրը որպես գրավ է օգտագործում: Ըստ մեր աղբյուրների, նա համաձայնել է Ռուսաստանի գործարքին ու կշեռքի մյուս նժարին դրել Ուկրաինայի ռազմավարական գործարանները, ծանր արդյունաբերությունը, օդագնացությունը և էներգաարտադրության օբյեկտները: Մենք ուզում ենք հստակ իմանալ, թե ինչն է նա գրավ դրել և որոնք էին դրա պատճառները»:
Դեկտեմբերի 17-ին կայացած Պուտին-Յանուկովիչ մոսկովյան հանդիպումից հետո Ռուսաստանի նախագահ Վլադիմիր Պուտինը մամուլի ասուլիսի ժամանակ հայտնել էր, որ Ուկրաինային տրամադրվող գազի գինը 400$-ից նվազել է 268-ի, ինչպես նաև Ռուսաստանը 15 միլիարդ դոլար է պատրաստվում ներդնել ուկրաինական արժեթղթերում:
Կարդացեք նաև
Պատրաստեց Հովհաննես ԻՇԽԱՆՅԱՆԸ
