Հայաստանից այս տարի հունվար-սեպտեմբեր ամիսներին մեկնել են 1 միլիոն 888 հազար 165 մարդ, որոնցից 108 հազարը չեն վերադարձել սա վիճակագրության ծառայության տվյալներն են, որն այսօր ներկայացրեց «Մարդը կարիքի մեջ» հասարակական կազմակերպության միգրացիոն ծրագրերի ղեկավար Տաթեւիկ Բեժանյանը:
Նրա ներկայացմամբ, մեկնողների մեծ մասը գնում է Ռուսաստան, քանի որ, ի տարբերություն եվրոպական երկրների, Ռուսաստան մեկնելու համար վիզա անհրաժեշտ չէ: Տիկին Բեժանյանի խոսքերով, հիմնականում Հայաստանից մեկնում են Ռուսաստան՝ աշխատանք փնտրելու կամ ավելի բարձր աշխատավարձով աշխատանք գտնելու համար, նույնիսկ արդարության բացակայության պատճառով են մեկնում: Մեր ճշտող հարցին՝ արդարություն Ռուսաստանո՞ւմ են փնտրում, տիկին Բեժանյանն ասաց՝ «Նույնիսկ Ղազախստան են մեկնել արդարություն պակասից»:
Կազմակերպությունն աշխատում է Արմավիրի, Արարատի, Վայոց Ձորի Սյունիքի մարզերում եւ միգրանտներին խորհրդատվություն տալիս, վերադարձածներից 27-ին կազմակերպությունն աջակցել է բիզնես սկսել՝ ծառայությունների մատուցման, հացաբուլկեղենի արտադրության եւ լոլիկի աճեցման ոլորտներում:
Միգրանտների մեծ մասը մեկնում է Ռուսաստան, ոչ միայն այն պատճառով, որ վիզա ստանալու կարիք չկա, այլեւ, ինչպես տիկին Բեժանյանն ասաց, ոչ պայմանագրային աշխատանք գտնելն էլ հեշտ է, ինչը չի կարելի ասել Եվրոպայի մասին: Հարցին, թե կա՞ն տվյալներ, թե որքան միգրանտ է մեկնել ու այլեւս չի վերադարձել, կազմակերպության ներկայացուցիչն ասաց, որ ոչ ոք նման տվյալներ չի կարող ասել:
Կարդացեք նաև
Տաթեւիկ Բեժանյանի ներկայացմամբ, մեկնողների մեծ մասի իրազեկվածության մակարդակը ցածր է, մեկնում են՝ չիմանալով թե ինչ է իրենց սպասվում. Նույնիսկ Ռուսաստան մեկնելիս էլ իրենք հստակ չգիտեն, թե հենց օդանավակայանում միգրացիոն թերթիկն ինչպես են լրացնելու: Մեկնողները հիմնականում ապավինում են այն անձանց, ովքեր նրանց իրենց հետ տանում են ու խոստանում աշխատանքի տեղավորել:
Մանրամասն ՝առաջիկայում
Նելլի ԲԱԲԱՅԱՆ
