Այսօր Գյումրու «Հոկտեմբեր» կինոթատրոնում Հայաստանի երիտասարդ կանանց ասոցիացիայի, Գյումրու քաղաքապետարանի ու Շիրակի մարզպետարանի նախաձեռնությամբ տեղի ունեցավ կին ձեռներեցների աշխատանքների ցուցահանդես-վաճառքը: Թեման հիմնականում Ամանորն էր, տաղավարներում ներկայացված էին ամանորյա սեղաններ` զարդարված քաղցրավենիքներով, թխվածքներով, չրերով, տոնածառի խաղալիքներով, կային նաև ձեռքով գործած մանկական հագուստներ և այլն:
Հայաստանի երիտասարդ կանանց ասոցիացիայի նախագահ Լիլիթ Ասատրյանի ներկայացմամբ, ցուցահանդեսի նպատակը կանանց ներուժը տարբեր ոլորտներում բացահայտելն է: «Մինչ այժմ այդ ցուցահանդես-վաճառքները իրականանում էին, մասնավորապես, Երևանում, որտեղ նաև մասնակցություն էին ունենում տարբեր մարզերից կանայք, կին-գործարարներ, կին-արտադրողներ: Այս անգամ մենք` Հայաստանի երիտասարդ կանանց ասոցիացիան, որոշեց մի փոքր փոխել ձևաչափը և ամեն ինչ, ինչպես ասում են, չկենտրոնացնել Երևանում, դուրս գալ դեպի մարզեր, մոտ լինել մարզերին, մարզերի բնակչությանը և մարզերի կանանց: Եվ սա առաջին փորձն է ըստ էության, որ Գյումրիում Հայաստանի երիտասարդ կանանց ասոցիացիան կազմակերպում է ցուցահանդես-վաճառք, որը Ամանորին ընդառաջ թեման է կրում: Եվ այստեղ այցելուները, գնորդները կարող են բերել շատ պիտանի և որակյալ ապրանքներ, արտադրանքներ, որոնք ինչպես կզարդարեին նրանց բնակարանները, կարող են նաև լավ նվերներ լինել», -ասաց Լիլիթ Ասատրյանը:
Aravot.am-ի հետ զրույցում ձեռներեց կանայք իրենց բողոքները ներկայացրեցին հարկային մարմիններից, պետության վարած վարկային քաղաքականությունից` նշելով, որ հայ կանայք, թեև իրենք իրենցով ձեռներեց են, սակայն հայրենի կառավարությունը գործարարների գլխին է խփում ու թույլ չի տալիս տեղաշարժվել: «Արաքս» հ/կ նախագահ Ալլա Խաչատրյանը, նկատեց, որ, եթե պետությունը գործարար միջավայրը զարգացնող օրենքներ մշակեր, ապա «Հոկտեմբեր» կինոթատրոնի սրահում տաղավարներն այսքան քիչ չէին լինի: Նա միաժամանակ ցուցադրեց իր սեղանը` հայ ժողովրդին խորհուրդ տալով` «Հերիք է սեղանները բդերով խեղդեք, մի քիչ էլ գույներով զարդարեք, տրամադրություն հաղորդեք»:
Գործարար կանանց դժգոհությունները վաղվա «Առավոտ» օրաթերթում:
Կարդացեք նաև
Նունե ԱՐԵՎՇԱՏՅԱՆ
