ՀՀ տրանսպորտի և կապի նախարար Գագիկ Բեգլարյանը դեկտեմբերի 17-ին ընդունեց Ասիական զարգացման բանկի ներկայացուցիչներին` բանկի Կենտրոնական և Արևմտյան Ասիայի տարածաշրջանի գլխավոր տնօրեն Կլաուս Գերհաուզերի գլխավորությամբ:
Հանդիպման ընթացքում կողմերը քննարկեցին «Հյուսիս-հարավ ճանապարհային միջանցք» ներդրումային ծրագրի ընթացքը, ընդգծեցին Հայաստանի համար դրա խոշոր ռազմավարական նշանակությունը, կարևորեցին երկկողմ համագործակցությունը:
Նախարար Գագիկ Բեգլարյանը ինչպես նախորդ հանդիպումների ժամանակ, այս անգամ ևս շեշտեց, որ նախարարության գերխնդիրը որակյալ ճանապարհ ունենալն է:
«Ծրագրի իրականացման ընթացքում առաջացել էին բավականին խնդիրներ: Ժամանակին կատարված համապատասխան միջամտությունից հետո դրանք արագ շտկվեցին: Այսօր աշխատանքները բնականոն ընթանում են: Թույլ չենք տալու ո՛չ շինարարական, ո՛չ վերահսկող ընկերությանը աղավաղել աշխատանքների ընթացքը, խոչընդոտել բարձր որակի ապահովումը: Բոլոր խնդիրների հիմքում ընկած է շինարարների խստապահանջ աշխատանքի և որակի ապահովումը»,-ասաց նախարարը:
Երրորդ և Չորրորդ տրանշերին անդրադառնալով՝ Գագիկ Բեգլարյանը նշեց, որ ընթացիկ փոփոխություններին, խնդիրներին արագ արձագանքելով՝ հնարավորություն կլինի հետագայում զերծ մնալ բոլոր այն դժվարություններից, որոնք եղել են Առաջին և Երկրորդ տրանշերի շինարարության ժամանակ:
Կարդացեք նաև
Կլաուս Գերհաուզերին որակի ապահովման վերաբերյալ նախարարի մտահոգությունների առնչությամբ նշեց, որ Ասիական զարգացման բանկը ևս շահագրգռված է ծրագրի բարեհաջող ավարտով:
ՀՀ տրանսպորտի և կապի նախարարության
լրատվական ծառայություն
