«Որոշ բախտագուշակներ, որոնց մեր գործընկերներից ոմանք կոչել էին Նոստրադամուսներ, բայց ես նրանց կոչում եմ փողոցային բախտագուշակներ կամ եղունգ նայողներ, գյուղական տերմիններով ժողովրդի մեջ օգտագործվում է էդպիսի բան. տարվա ընթացքում տարբեր գուշակություններ են անում արտադրության մասին` կաբինետներում նստած, կյանքից կտրված, որոնք ռեալ կյանքում ոչ մի անգամ չեն համապատասխանում իրականությանը»,-այսօր նման հայտարարություն արեց գյուղատնտեսության փոխնախարար Սամվել Գալստյանը, ակնարկելով գյուղոլորտի այն մասնագետների հնչեցրած կարծիքները, որ բերքի նվազում է լինելու այս տարի:
Իսկ թե ովքեր են Նոստրադամուսները, պարոն Գալստյանը անուններ չտվեց:
Փոխնախարարը ներկայացրեց տվյալներ, ըստ որի՝ տարին բարենպաստ է եղել գրեթե բոլոր տեսակի մշակաբույսերի, պտուղ-բանջարեղենի համար: Ըստ պարոն Գալստյանի` այս տարի, չնայած կարկտահարությանը, ծիրանի արտադրության ծավալները չեն նվազել, միայն դեղձի արտադրությունն է պակասել:
Փոխնախարարի ներկայացմամբ`բանջարեղենի արտադրության աճ է արձանագրվել. անցյալ տարի բանջարեղենի ցուցանիշը կազմել է 840.9 տոննա, այս տարի` 868.3 հազար տոննա: Պարոն Գալստյանի ներկայացմամբ` այս տարածված ցեցը վնասներ է հասցրել կարտոֆիլի եւ լոլիկի ցանքատարածություններին, սակայն նախարարությունը, ինչպես վստահեցրեց պարոն Գալստյանը, կարտոֆիլի վնասները փորձել է նվազագույնի հասցնել, լոլիկի վնասները ջերմոցներում եւս նվազագույնի է հասցվել, եւ ցեցի տարածումը կանխվել է, սակայն բաց տարածքներում տարբեր միջոցառումներ պիտի կատարվեն, որպեսզի վնասների ծավալը չավելանա:
Այս տարի, ըստ փոխնախարարի, 659.6 տոննա կարտոֆիլ է արտադրվել, նախորդ տարվա 674 հազար տոննայի համեմատ, 20 հազար տոննա էլ` արտահանվել է, շուկայում գների մեծ տատանումներ նախարարությունը չի արձանագրել:
Հարցին, թե դաշտերում տարածված ցեցն ինչպե՞ս է ազդել կարտոֆիլի արտահանման ծավալների վրա եւ արդյոք գազի գնի փոփոխությունն ազդե՞լ է գյուղմթերքների արտադրության վրա, պարոն Գալստյանն ասաց, որ այս տարի շուկայում լոլիկի գինը պահպանվել է, բայց որոշակի ժամկետներում բարձր է եղել. «Կարտոֆիլի հետ կապված արտահանման մեկ դեպք է արձանագրվել, այլեւս ոչ մի դեպք չի եղել, ոչ մի խմբաքանակ չի վերադարձվել: Հիմնականում արտահանվում է Վրաստան, Միջին Ասիական երկրներ, Իրան»:
Մանրամասն` տեսանյութում
Նելլի ԲԱԲԱՅԱՆ
