ՀՅԴ Հայաստանի Գերագույն մարմնի ներկայացուցիչ Արմեն Ռուստամյանը կրկին պնդում է, որ հունվարի մեկից կիրառվող կուտակային կենսաթոշակային պարտադիր համակարգի ներդրումը արտագաղթի մեծ ալիք է բերելու:
«Առանց այդ էլ արտագաղթի խնդիրը չենք լուծել: Երիտասարդների նկատմամբ սա ուղղակի կեղեքիչ ու վաշխառուական մոտեցում է, որ իշխանությունները իրականացնում են: Ի՞նչ է նշանակում մարդիկ 5 տոկոս կուտակեն, որոնք այսօր նվազագույն անհրաժեշտ կարիքները բավարարելու հնարավորություն չունեն: Իսկ ծերերի նկատմամբ անմարդկային եւ անբարո մոտեցում է, նշանակում է ծերերին թողնել բախտի քմահաճույքին, որովհետեւ այս համակարգը համերաշխության սկզբունքից հրաժարվել է նշանակում եւ անցում կատարել դեպի ինքնաֆինանսավորման համակարգի»,- այսօր, նախքան ՍԴ բողոքի երթը սկսելը՝ Ազատության հրապարակում ասաց պարոն Ռուստամյանը:
Նրան հատկապես անընդունելի է իշխանությունների «ինքնագլուխ» որոշումները. «Հասարակությանը հարցնելու փոխարեն, իշխանությունները, ինչպես միշտ, ինքնագլուխ, ժողովրդի փոխարեն որոշում են այսպիսի լուրջ հարցեր»:
Արփինե ՍԻՄՈՆՅԱՆ
