«Ես դիմել եմ բոլոր քայլերին, գնալու եմ մինչև վերջ, մինչև իմ ունեցվածքը պետությունը, կառավարությունը, բանկը ետ չտա»,-Aravot.am-ի հետ զրույցում այսպիսի կարծիք հայտնեց սնանկացման եզրին կանգնած գործարար Փայլակ Հայրապետյանը:
Նշենք, որ գործարարը ՀՀ Վարչական դատարանում դատի է տվել կառավարությանը:
Պարոն Հայրապետյանն ասաց, որ իր համբերության բաժակը լցվել է, ու ինքը գնալու է մինչև վերջ: Այնուհետև շեշտեց. «Կառավարությունը պիտի իմ ունեցածը հետ տա, այնինչ՝ ձեռքերը լվացել, կանգնել է մի կողմ, այն դեպքում, երբ գումարները օֆշորի գոտի են գնացել, այնտեղ Սարգսյանը, Կճոյանն ու Աշոտն են գրանցվել, հետո գումարները հետ են եկել Երևան, բանկից հանել, գնացել ոսկի են գնել»:
Պարոն Հայրապետյանը վրդովված նշեց, թե «մի մարդ տասը ռուբլի գողանում է, տասը տարի դատում են, հիմա տասը միլիոն գողացել, ոսկի են առել, ո՞ւր է գնացել, ոչ ոք չգիտի»:
Կարդացեք նաև
Փայլակ Հայրապետյանը նշում է, որ «եթե իր ունեցվածքը հետ չտան, աշխարհում ամեն տեղ խայտառակելու է»:
Մեր ճշտող հարցին` կառավարություն ասելով ` մասնավորապես ո՞ւմ նկատի ունի: Պարոն Հայրապետյանը պատասխանեց. «Կառավարություն ասելով նկատի ունեմ վարչապետին, նախարարին, «Ամերիաբանկի» կառավարչին ու նրա տեղակալներին, քանի որ կեղծ բիզնես ծրագիր են կազմել, այդ գումարը բաց թողել, Կենտրոնական բանկը չի հետևել` այդ գումարը ուր է գնացել»:
Տեղեկություններ կան, որ օֆշորի գործով Հայաստանից Կիպրոս մեկնած քննիչների խումբը վերադարձել է Հայաստան: Փայլակ Հայրապետյանից հետաքրքրվեցինք` իրենք լուրեր ունե՞ն, ի՞նչ են պարզել քննիչները: Նա պատասխանեց. «Ինձ քննիչի մոտ են կանչել ու տեղեկացրել, որ ստորագրությունը տվել են ստուգման: Ուրիշ ոչ մի տեղեկություն չունեմ»:
Ամփոփելով՝ պարոն Հայրապետյանն ասաց. «Իմ գնահատականն այն է, որ կառավարությունը պիտի խելքի գա ու անցնի նորմալ աշխատանքի, քանի որ այսպես երկար աշխատել հնարավոր չէ»:
Տաթև ՀԱՐՈՒԹՅՈՒՆՅԱՆ
