«Սա ոստիկանության, ավելի ճիշտը՝ իշխանության , նոր ռազմավարությունն է ակտիվ քաղաքացիների դեմ: Ի վերջո` մենք ենք վճարում մեզ դատարաններ քարշ տվողների աշխատավարձը. իրենց ի՞նչ եղել որ»,-Aravot.am-ի հարցին` ինչպիսի՞ գնահատական կտա այն փաստին, որ, ինչպես ինքն է նշել, ստիպված է օրը երկու դատական գործի մասնակցել, այսպես արձագանքեց քաղաքացիական ակտիվիստ Վարդգես Գասպարին:
Շարունակելով՝ մեր զրուցակիցը նկատեց. «Մենք վճարում ենք ե՛ւ նրանց , և՛ մեր հատկացրած ժամանակի համար: Այնպես, ինչպես մեկ այլ վարչական գործով 18 ամիս քարշ տվեցին եւ վերջում առանց պատճառաբանության ոստիկանությունը հետ վերցրեց իր հայցը»:
Հիշեցնենք, որ Վարդգես Գասպարին մի առիթով հայտնել էր, թե իր մոտ սկսել են ի հայտ գալ այնպիսի օրեր, որ օրը 2 դատի է լինում:
Վահե Ավետյանի սպանության դեպքի կապակցությամբ Հարսնաքար ռեստորանային համալիրի տարածքում բողոքի ակցիաների առիթով բերման էր ենթարկվել նաև Վարդգես Գասպարին: Այս կապակցությամբ ՀՀ ոստիկանությունը Վարդգես Գասպարիից պահանջում է բռնագանձել 30 000 դրամ տուգանք:
Կարդացեք նաև
Հետաքրքրվեցինք` ի՞նչ ընթացք է ստացել այդ գործը, քանի որ Վարգես Գասպարին այդ պահանջը անհիմն է համարում: Նա տեղեկացրեց, որ գործը դեկտեմբերի 26-ին, ժամը 14.00-ին կքննվի Վարչական դատարանում:
ՌԴ նախագահ Վլադիմիր Պուտինի դեմ կազմակերպված ակցիայի ժամանակ ևս Վարդգես Գասպարին բերման ենթարկվեց: Այս անգամ բերման ենթարկվելիս նա մարմնական վնասվածքներ էր ստացել : Նա այս առիթով խնդրել էր դատաբժշկի ուղեգրի, բերման ենթարկելու և կազմված փաստաթղթերի լուսապատճենները: Հետաքրքրվեցինք` ստացե՞լ է իր պահանջած փաստաթղթերը: Վարդգես Գասպարին պատասխանեց. «Ոչ մի պատասխան: Դատաբժշկական ուղեգիր ստանալու համար հրավիրել էին ոստիկանության , դա տվեցին, բայց փաստաթղթերի պատճեները չտվեցին: Բացատրություն տալուց հրաժարվեցի՝ նշելով , որ ողջ իրավապահ համակարգը միեւնույն հանցագործ համակարգի տարբեր մարմիններն են, եւ չեմ ցանկանում մասնակցել այդ խեղկատակությանը»:
Վարդգես Գասպարին Վարչական դատարանում Վահե Ավետյանի սպանության գործով հրավիրված դատական նիստում կարծիք էր հայտնել, թե «ոստիկանությունը աշխատում է ընդդեմ հասարակության և հօգուտ կրիմինալ կարգերի»:
Հարցին` ի՞նչ հիմքեր ունի նման կարծիք հայտնելու, պարոն Գասպարին պատասխանեց. «Ոստիկանության գործունեությունն ընդհանրապես, այդ թվում ս/թ հուլիսի 4-ին «Հարսնաքարի» մոտ Վ. Ավետյանի սպանության դեմ բողոքի ակցիայի կանխումը մի քանի տասնյակ ոստիկանների միջոցով, ի սկզբանե ուղղված է ընդդեմ քաղաքացիական հասարակության և ի շահ կրիմինալ կարգերի ամրապնդման: Ընդ որում, դատարան ներկայացված ոստիկանության այս հայցադիմումը հանդիսանում է այն հանձնարարականի շարունակությունը, որը ստացել է ոստիկանությունը օլիգարխ Ռ. Հայրապետյանից ՝ ի դեմս Հ. Զոհրաբյանի: Ոստիկանությունը, լինելով հանցագործ աշխարհի անթաքույց ներկայացուցիչը Հայաստանի կառավարման համակարգում, ներկայացնելով ի սկզբանե անհիմն , անհեթեթ հայցադիմումներ քաղաքացիական հասարակության ներկայացուցիչների դեմ, փորձելով վատնել ակտիվ քաղաքացիների օգտակար ժամանակը և էներգիան, կատարում է կրիմինալ օլիգարխիայի հանձնարարությունը»:
Տաթև ՀԱՐՈՒԹՅՈՒՆՅԱՆ
Լուսանկարը՝ Լուսինե ԽԱՉԱՏՐՅԱՆԻ. Epress.am
