Aravot.am-ը ԱԺ պատգամավոր Ալեքսանդր Արզումանյանից հետաքրքրվեց, թե ինչ կարծիքի է Թուֆենկյան համալիրում մեկնարկած «Հայ-վրացական միջխորհրդարանական համագործակցության հեռանկարները» խորագրով երկօրյա համաժողովի մասին:
«Կարեւոր հանդիպում է, վերջին տարիներին ինչ-ինչ պատճառներով նման հանդիպումներ չեն եղել եւ բավականին ցածր մակարդակի վրա են հայ-վրացական խորհրդարանական հարաբերությունները: Սա միջոց է ավելի ակտիվացնելու հարաբերությունները: Այնպես որ կճշգրտվեն հայ-վրացական հարաբերությունների հետ կապված տարբեր խմբակցությունների մոտեցումները՝ թե ընդդիմադիր, թե իշխանական, ինչպես եւ հարիր է հարեւան, բարեկամ երկրին»,-ասաց պարոն Արզումանյանը:
Իսկ ի՞նչ հարցեր կուզենար, որ շոշափվեր այս համաժողովին: «Երեք բլոկով են լինելու քննարկումները՝ արտաքին քաղաքական, տնտեսական, ինչպես նաեւ կրթություն, գիտություն մշակույթ: Միջազգային կառույցներում խորհրդարանական համաժողովներում ցավոք սրտի մոտեցումները մեկ-մեկ հակասում են միմյանց, պետք է փորձենք ճշգրտումներ մտցնել, որպեսզի մեկը մյուսի դեմ հանդես չգա եւ չընկալվի այնպես, որ մի երկիրը հանդես է գալիս մյուսի դեմ: Կարծում եմ՝ դա հնարավոր է, եթե ավելի հաճախ հանդիպենք, բարձրաձայնենք մեր տարբերությունների մասին»,-ասաց ԱԺ պատգամավորը: Պարոն Արզումանյանը հավելեց, որ հաճախ վրացական կողմը հակառուսական դիրքորոշում է ցուցաբերում, ու հայ-վրացական հանդիպումների արդյունքում գուցե Հայաստանը միջնորդ լինի եւ ինքնանպատակ չլինեն Ռուսաստանին դատապարտող հայտարարությունները:
Գոհար ՀԱԿՈԲՅԱՆ
