«Ահմեդ Դավութօղլուի այցը` դա հենց այնպես այց չէր, այն փորձում է հաստատել, որ Թուրքիան բոլոր դեպքերում շահագրգիռ է տարածաշրջանային խնդիրների վերաբերյալ եւ նրանք նախապես հայտարարել էին, որ Հայաստանը, Վրաստանը եւ Ադրբեջանը միասնական ծրագրեր անեն ու եթե ժամանակը գա կորող են իրականացնել, այստեղ այդ հայտարարության վերաբերյալ արձագանք չեղավ»,- Aravot.am-ի հետ զրույցում ասաց սոցիոլոգ Ահարոն Ադիբեկյանը, մեկնաբանելով Թուրքիայի արտգործնախարար Ահմեդ Դավութօղլուի այցը:
Ահարոն Ադիբեկյանի կարծիքով`Թուրքիան սպասում էր, որ մենք ուրախացած նրան կընդունենք: Նա համոզված է`«Շատ լավ էր, որ նրանց բավականին զուսպ դիմավորեցինք, եւ վատ է, որ բողոքի ցույց եղավ, ինչի շնորհիվ նրանց ռեյտինգը բարձրացրեցինք»:
Ահարոն Ադիբեկյանը գտնում է` Թուրքիան վերահաստատեց, որ տարածաշրջանում ունի շահեր եւ պատրաստ է նույնիսկ նման քայլերի գնալ եւ մի երկիր, որը փաստորեն փակման մեջ է պահում` իր արտգործնախարարը ներկայանում է այնտեղ. «Մենք վերահաստատեցինք մեր պատրաստակամությունը ընդունել նման մակարդակի թուրք գործչին, որովհետեւ փաստ էր, որ նա տարածաշրջանում հետաքրքրություն ունի եւ պատրաստ է տարբեր քայլերի: Նա չէր եկել այստեղ բանակցելու, հարց լուծելու եւ նա այդ մարդը չէ, որ նման քայլերի գնա, նրա գալը համաձայնեցված էր Էրդողանի հետ, հետեւաբար բոլոր քայլերը, բանակցությունները պետք է Էրդողանի հետ տանել, իսկ նա ընդամենը իրականացնողն է Էրդողանի ընդունած որոշումների»:
Կարդացեք նաև
Եվա ՀԱԿՈԲՅԱՆ
