Նախախորհրդարանի քարտուղարության անդամ Ժիրայր Սեֆիլյանը պնդում է՝ իրենք չեն սպասելու մինչեւ 2018 թվական՝ հաջորդ նախագահական ընտրություններին:
«Սա մեր կամայական որոշումը չէ, համոզված ենք, որ մեր ժողովուրը մինչեւ 2018 թվական դիմանալու ռեսուրս չունի: Մենք սպասողը չենք»,- այսօր Նախախորհրդարանի գրասենյակում հրավիրված ասուլիսում ասաց պարոն Սեֆիլյանը:
Հետո հորդորեց քաղաքական եւ քաղաքացիական ակտիվ շրջանակներին՝ հակառակ իրենց այսօրվա որոշումների՝ միանալ իրենց պայքարին. «Չենք ուզում ստիպել, դուրս եկեք ձեր պատկերացրած պայքարից, միացեք մեզ, այլ հնարավոր է նաեւ «եւ, եւ» տարբերակը: Մեր պատկերացրած պայքարի ընթացքը անպայման միավորումներով պետք է լինի: Մեզ կհաջողվի համախմբել բոլոր ազնիվ պայքարողներին»:
Նա նաեւ հիշեցրեց, որ վաղվանից սկսվում են ամենշաբաթյա իրենց երթերը: Նախատեսում են իրազեկող երթեր. «Ժողովրդին իրազեկենք, որ իրավիճակը սարդարապատային է: Ուզում ենք նաեւ մեր ժողովրդին ոգեւորենք, որ ամեն ինչ կորած չէ»:
Կարդացեք նաև
Պարոն Սեֆիլյանը նաեւ ասաց, որ իրենց երեւանցի համախոհների թիվը հասել է հազարի, աշխատում են նոր համախոհներ ձեռք բերելու ուղղությամբ: Ասաց, իրենց համար թվաքանակը կարեւոր չէ, կարեւորը ինքնակազմակերպվելն է, որ կարողանան համակարգային փոփոխություններ իրականացնել:
Նախախորհրդարանի անդամ Գարեգին Չուգասզյանն էլ ասաց, որ facebook-ի իրենց համախոհների թիվը հասնում է վեց հազարի ու նորանոր մարդիկ են հետաքրքրվում:
Նախախորհրդարանի անդամ Հրանուշ Խառատյանը խոստովանեց, որ չի կարողանում իշխանությունների հասցեին չխոսել. «Որքան մարդիկ ավելի հստակեցնում են իրենց ճնշումները իշխանությունների վարքի վրա, այնքան մեր իշխանություններն ինտենսիվ արհամարհում են հասարակության սկզբունքային մոտեցումները: Սուտ խոսելը մեր իշխանությունների համար դարձել է նորմա: Ստերի շարքն այնքան մեծ է, որ մտածում եմ՝ արդյոք այս սեպտեմբերի երեքին Հայաստանի նախագահը սուտ չի՞ ասել, որ երկիրը տանում է Մաքսային միություն, ինչպես ԵՄ հետ այդքան երկար քննարկումները արդյոք սուտ չէի՞ն»:
Նա քննադատեց Հայաստանի վարած արտաքին քաղաքականությունը եւ ասաց, որ այդ ոլորտում հայ դիվանագետները անգործության են մատնված. «Խնդիրը արտաքին քաղաքականության բացակայությունն է: Մեր դիվանագետներն անգործ են, որեւէ ծրագիր չեն ներկայացնում, գոնե հանրությանը հայտնի չեն այդ ծրագրերը: Զբաղված են մի քանի օլիգարխների առեւտրատնտեսական ծրագրերը ներկայացնելով: Հայաստանի արտաքին քաղաքականությունը նշանակում է Հայաստանի նկատմամբ այս կամ այն երկրի ծրագրերի հաջող իրականացում»:
Հարցին, հնարավո՞ր է «Քաղաքացիական պայմանագիր» նախաձեռնության հետ համագործակցություն, պարոն Սեֆիլյանն ասաց. «Դրական ենք վերաբերվում նախաձեռնությանը, ողջունում ենք իրենց նախաձեռնությունը, բայց ունենք մարտավարական տարակարծություններ: Ընթացքում կփորձենք քննարկումներ ունենալ: Գլխավոր տարակարծությունը՝ նրանք գնում են 2018 թվականի ընտրություններին, մենք կտրականապես մերժում ենք: Համոզված ենք, որ մեր ժողովուրդն այդ ռեսուրսները չունի:
Արփինե ՍԻՄՈՆՅԱՆ
