«Այս օրենքը սիմվոլիկ բնույթ է կրում, քանի որ կառավարությունը կաշկանդված չէ այս օրենքով»,-այսօր «Հայելի» ակումբում լրագրողների հետ հանդիպմանը հայտարարեց քաղաքագետ Անդրեաս Ղուկասյանը:
Նա տվեց հետևյալ հարցը. «Որքանո՞վ է իրատեսական 650 միլիարդ դրամ հանրությունից գանձելը: Դա նշանակում է, որ միջին հաշվով յուրաքանչյուր քաղաքացի տարվա ընթացքում մեկ միլիոն դրամի ապրանքներ ու ծառայություններ պիտի գնի մեր երկրի տարածքում, որ կառավարությունն ակնկալի այդ գումարի գանձումները: Իսկ դա հակասում է այն իրավիճակին, որ յուրաքանչյուր քաղաքացի տարեկան 400 հազար դրամից պակաս գումար է ծախսում իր գոյությունը պահպանելու համար: Ուստի ակնկալել մեկ միլիոն դրամի սպառողական կարողություն՝ անհիմն մի ենթադրություն է»: Պարոն Ղուկասյանը նշեց, որ խորհրդարանում խոսակցությունները հենց այնպես են վարվում:
Հակադարձելով՝ ՀՀԿ խմբակցության պատգամավոր Արտակ Դավթյանը նշեց. «ԱԺ-ում քննարկվել է այս հարցը, օրենքում կատարվել է համապատասխան փոփոխություն: Բայց նախորդ տարվա բյուջեի կատարողականները թույլ են տալիս ենթադրել, որ այս բյուջեն ևս իրատեսական է և հավաքագրումների ցուցանիշները և մնացած բոլոր հոդվածները 2014-ին իրականություն կդառնան»:
Տաթև ՀԱՐՈՒԹՅՈՒՆՅԱՆ
