Ուկրաինայի ներքին գործերի նախարար Վիտալի Զախարչենկոն ևս մեկ անգամ վստահեցրել է, որ Կիևի Անկախության հրապարակի ցույցերը բռնի ուժով չեն ցրելու: Հայտնում է ուկրաինական «Ինտերֆաքս»-ը:
«Ես ուզում եմ, որ բոլորը հանգիստ լինեն. Մայդանի ցույցերը չեն ցրվելու: Ոչ ոք չի խախտի քաղաքացիների խաղաղ բողոք անցկացնելու իրավունքը: Սակայն չպետք է արհամարհվի մյուս քաղաքացիների իրավունքներն ու օրինական շահերը: Քաղաքի բնականոն ընթացքը չպետք է խախտվի», – Զախարչենկոյի խոսքերը ՆԳՆ-ի մամուլի ծառայությունը փոխանցել է չորեքշաբթի օրը:
Նախարարը նշել է, որ մի քանի օր է, ինչ Կիևում երթևեկությունը անմխիթար վիճակում է, մայրաքաղաքի ճանապարհների խցանումները հասել են առավելագույն մակարդակին՝ 10 միավորի:
«Քաղաքի հիմնական մայրուղիները փակված են բարիկադներով: Բացի այդ, դրանք տեղադրելու համար դաժանորեն ոչնչացվում են ծառեր և համայնքային սեփականություններ: Բազմաթիվ մարդիկ, հիմնականում կենտրոնում բնակվող, դիմել են ներքին գործերի նախարարությանը՝ բողոքելով, որ չեն կարողանում իրենց տուն հասնել և հանգիստ չունեն գիշերները, – փոխանցել է Զախարչենկոն՝ հիշեցնելով, որ ցուցարարները խախտում են այլոց իրավունքները, – դրա համար ցույցի մասնակիցներին կոչ եմ անում հարգել օրենքի պահանջները»:
Կարդացեք նաև
Պատրաստեց Հովհաննես ԻՇԽԱՆՅԱՆԸ
