Yerkir.am-ի տեղեկություններով, բանաստեղծներ Աշոտ Գաբրիելյանը եւ Մանե Գրիգորյանը որոշել են լքել Հայաստանի գրողների միությունը:
Մանե Գրիգորյանի հետ կապվել չհաջողվեց, իսկ բանաստեղծ Աշոտ Գաբրիելյանը Aravot.am-ի հետ զրույցում նշեց, որ Հայաստանի գրողների միությունից դուրս գալու դիմում վաղուց էր ներկայացրել. «Նույնիսկ ընտրություններից առաջ երիտասարդներին կոչ էի արել բոյկոտել ընտրությունները: Հույս ունեցա, որ ընտրություններից հետո նոր նախագահը միգուցե գործնական քայլեր կձեռնարկի բարեփոխումների համար, սակայն ընդհակառակը՝ ամեն ինչ ավելի վատացավ՝ Գրողների միության կառավարման համակարգով, ամեն անարդարություններով հանդերձ»:
Հարցրինք, մի՞թե Գրողների միության անդամ լինելը ինչ-որ բանով նպաստում է լավ գրելուն: «Ստեղծագործելու համար Գրողների միությունը ոչ մեկին էլ ոչինչ չի կարող տալ, ընդհանրապես ես միշտ էլ այն կարծիքին եմ եղել, որ ՀԳՄ-ն սովետի մնացուկ է, որը այդ համակարգի օրոք օգտագործվել է կուսակցության գաղափարախոսության համար: Ավելի լավ կլինի, որ գրահրատարակչության եւ այլ դաշտերում մրցակցություն լինի, ոչ թե մի քանի մարդ Գրողների միության անվան տակ ամբողջը վերցնեն իրենց ձեռքը, եւ գրողի վարկանիշը գցեն, եւ գրականության: Այսօր ունենք լավ գրականություն ու լավ գրողներ, բայց քանի որ մարդկանց հայացքը հառված է Գրողների միությանը, իսկ այն իրեն պատշաճ չի պահում, բնականաբար ընկնում է այսօրվա գրողի ու գրականության վարկը հասարակության մեջ»,-ասաց բանաստեղծը:
Հավելենք, որ ավելի վաղ գրականագետներ Արքմենիկ Նիկողոսյանը եւ Հասմիկ Հակոբյանը ՀԳՄ-ից դուրս գալու դիմում էին ներկայացրել, իսկ գրող Գուրգեն Խանջյանը սառեցրել էր իր անդամակցությունը:
Գոհար ՀԱԿՈԲՅԱՆ
