Փաստաբանների պալատի անդամ ՀԱՅԿ ԱԼՈՒՄՅԱՆԸ լիովին համամիտ է Մարդու իրավունքների պաշտպանի ներկայացրած փաստարկներին. «Այդ դժգոհությունները նաեւ մերն են, եւ մենք բազմիցս ենք դրանց մասին բարձրաձայնել: Երկու անգամ փաստաբանները դատադուլ են հայտարարել Վճռաբեկ դատարանի անարդար գործունեության համար, բարձրաձայնվել են համակարգում առկա մի շարք արատներ, եւ այսօր ի վերջո բոլորիս բողոքները ասես ի մի բերվելով` հրապարակվեցին պաշտպանի զեկույցում»։
Փաստաբան ԳԵՎՈՐԳ ԳՅՈԶԱԼՅԱՆԸ նույնպես հաստատում է զեկույցում ներկայացված փաստերի իսկությունը։
«Ձեւավորված է, այսպես կոչված, Վճռաբեկ դատարանի «զոնալ դատավորների» ինստիտուտը: Ըստ այդ համակարգի՝ Վճռաբեկ դատարանի առանձին դատավորներ ունեն իրենց կցված եւ իրենց վերահսկողությանը ենթակա դատավորներ մնացած ատյաններում, ովքեր իրենց հետ պետք է համաձայնեցնեն համապատասխան դատական գործերը, հատկապես եթե այդ գործը հանրային հնչեղություն ունի»,- ասում է Գ.Գյոզալյանը։
Սակայն ներկայացված փաստերի համար, ցավոք, անհնար է ապացույցներ հայթայթելը. «Այնպիսի դատական մեխանիզմ է ստեղծված, որ համակարգից ցանկացած ոք կհրաժարվի ցուցումներ տալուց, ապացույցներ ներկայացնելուց: Ես` որպես կարգապահական գործեր քննող փաստաբան, տեղյակ եմ, որ սովորաբար կոռուպցիոն մեխանիզմները գործում են փաստաբանների միջոցով:
Մենք ունենք բավական շատ «գրպանի» փաստաբաններ, որոնք գումարներ են վերցնում եւ տալիս դատավորին, կաշառում են նրան` իբրեւ միջնորդ: Բայց եթե հանկարծ փաստաբանին մերկացնեն` նա երբեք չի խոստովանի, որ գումարը դատավորին է տվել, որովհետեւ կաշառքի միջնորդության համար կդատապարտվի ավելի խիստ պատժաչափով, քան եթե դատապարտվի խարդախության համար»:
Թագուհի ԱՍԼԱՆՅԱՆ
Հոդվածն ամբողջությամբ՝ «Հայոց աշխարհ» թերթի այսօրվա համարում
Բավական է մի հայացք քցել այսօրվա Հայաստան պետության վրա և միանգամից հստակ պատկերացում կարելի է կազմել մեր, այսպես կոչված, արդարադատության համակարգի որակների մասին: Այդ պատկերը դուք եք կերտել, “հարգելի” դատավորներ, և դրա համար պատասխան եք տալու հայ ժողովրդի զավակներին, եթե նույնիսկ այդ ժողովրդի զավակները հայրենազրկված ու ցրված լինեն աշխարհով մեկ՝ ձեր արգասաբեր գործունեության հետևանքով…