«Հայկական առցանց լրատվամիջոցները մարդու իրավունքների ոլորտին անդրադառնում են հիմնականում Երևանում, մինչդեռ մարզերում էլ քիչ չեն մարդու իրավունքների ոտնահարման դեպքերը»: Այս մասին այսօր լրագրողների հետ հանդիպման ժամանակ ասաց «Սոցիոսկոպ» ՀԿ-ի համանախագահ Էվելինա Գյուլխանդարյանը՝ ներկայացնելով eTV-ի համար արված մշտադիտարկման արդյունքները։
Նշենք, որ «Սոցիոսկոպ» ՀԿ-ի մասնագետները դիտարկել են 9 կայքերում (epress.am, hetq.am, tert.am, lragir.am, news.am, azatutyun.am, galatv.am, aravot.am, Ilur.am) օգոստոս, սեպտեմբեր և հոկտեմբեր ամիսների ընթացքում հրապարակված, մարդու իրավունքների (ՄԻ) ոլորտին առնչվող նյութերը (1004 հոդված)։
Դիտարկումները ցույց են տվել, որ ՄԻ ոլորտին վերաբերող նյութերի միայն 8%-ն է անդրադառնում մարզերում տեղի ունեցած դեպքերին:
Էվելինա Գյուլխանդարյանի փոխանցմամբ՝ Արարատի և Արագածոտնի մարզերին վերաբերող նյութերում մարդու իրավունքներին առնչվող որևէ հրապարակում չի եղել, իսկ Սյունիքի և Տավուշի մարզերին անդրադարձող նյութերը հիմնականում վերաբերել են բնապահպանական հիմնախնդիրներին: Ամենաշատը՝ 14 հոդված, վերաբերել են Լոռու մարզում մարդու իրավունքների խախտումներին։
Հետազոտությունը ցույց է տվել նաև, որ առցանց լրատվական կայքերը մարդու իրավունքների մասին գրում են, երբ դրանք խախտվում են որևէ հանրային միջոցառման ժամանակ (քաղաքացիական ակցիաներ և այլն), իսկ հետաքննություններ շատ քիչ են արվում (կազմում են ՄԻ ոլորտին առնչվող նյութերի 1.7%-ը):
Սիրանուշ ՀԱՅՐԱՊԵՏՅԱՆ
