Ուկրաինայի նախագահ Վիկտոր Յանուկովիչը խոստացել է անկողմնակալ լինել Կիևում տեղի ունեցած իրադարձությունները գնահատելիս: Հաղորդում է ուկրաինական «Ինտերֆաքս»-ը:
«Գնահատականներ տալիս ես կփորձեմ միշտ օբյեկտիվ լինել: Ինձ համար դա շատ սկզբունքային հարց է», – ասել է Յանուկովիչը՝ ավելացնելով, որ հանգել է համապատասխան եզրակացությունների և հասկանում է, որ ներկայիս իշխանությունն է պատասխանատու կատարվածի համար:
«Ամբողջ պատասխանատվությունն այսօր ընկած է ներկայիս իշխանությունների վրա», – ասել է նա, ինչին Ուկրաինայի երկրորդ նախագահ (1994-2004թթ.) Լեոնիդ Կուչման արձագանքել է. «Մեկ հոգու վրա»: Ըստ Կուչմայի, Ուկրաինայի հասարակությունը նախագահից հստակ ազդակներ է ակնկալում:
Ուկրաինայի առաջին նախագահ (1990-1994թթ.) Լեոնիդ Կրավչուկն իր հերթին քննադատել է ցուցարարների դեմ ուժի կիրառումը ու կոչ է արել դեպքերի հետ կապված արդարացի հետաքննություն իրականացնել:
Կարդացեք նաև
«Ուժայինները պետք է իմանան՝ խփելն անթույլատրելի է», – ասել է Կրավչուկը, ինչին Յանուկովիչը պատասխանել է. «Միանշանակ»:
Վիկտոր Յանուկովիչը Ուկրաինայի երեք նախկին նախագահների հետ հանդիպել է այսօր՝ քննարկելու երկրում ստեղծված իրավիճակից դուրս գալու հարցը:
Պատրաստեց Հովհաննես ԻՇԽԱՆՅԱՆԸ
