Այսօր ԲՀԿ խմբակցության քարտուղար Նաիրա Զոհրաբյանն ու ՀՅԴ խմբակցության անդամ Արծվիկ Մինասյանը նախաձեռնել են դիմել Սահմանադրական դատարան: Խնդիրը վերաբերում է պարտադիր կուտակային կենսաթոշակային համակարգի ներդրմանը, որը կառավարությունը նախատեսում է գալիք տարվա հունվարի մեկից: Պատգամավորները եւ ակտիվիստները հայտարարել էին, որ հարցը նաեւ ՍԴ-ում են վիճարկելու: ՍԴ դիմելու համար անհրաժեշտ է 27 ստորագրություն, պատգամավորներն արդեն իսկ 40 ստորագրություն են հավաքել: Առաջիկա օրերի ընթացքում դիմումը կներկայացվի Սահմանադրական դատարան:
Aravot.am-ի եւ Panaroma.am-ի հետ զրույցում ԲՀԿ խմբակցության քարտուղար Նաիրա Զոհրաբյանն ասաց, որ խորհրդարանական ընդդիմադիր եւ այլընտրանք չորս քաղաքական ուժերի ներկայացուցիչներից կազմված աշխատանքային խումբը, որն աշխատում է Սահմանադրական դատարանի դիմումի վրա, կարևոր է համարում այն, որպեսզի դիմումը լինի անխոցելի. «Իհարկե, ես անձամբ հրաշալի գիտակցում եմ, թե ինչ բախտի է արժանանալու այս դիմումը, ինչպես և Սահմանադրական դատարան դիմած բազմաթիվ դիմումներ…նախադեպեր ունեցել ենք: Բայց սա է ճանապարհը և մենք պետք է առաջ շարժվենք դրանով՝ Սահմանադրական դատարանում վիճարկելով որոշ դրույթներ»:
Հետագա հնարավոր անելիքները կհստակեցվեն ՍԴ-ի պատասխանից հետո:
«Մեկ բան հստակ է, այս օրենքի կիրարկումը ուղղակիորեն ունենալու է կործանարար հետևանքներ»,- ասաց մեր զրուցակիցը` հավելելով, որ կառավարության կողմից ձեռնարկվող կարճաժամկետ լուծումները, երբ տարբեր կազմակերպությունների, այդ թվում նաեւ բանկերի ներկայացուցիչների հետ հանդիպումներից հետո հայտարարություններ են անում, որ տոկոսները վերցնում են իրենց վրա, միտված են բողոքի ալիքը լռեցնելուն: «Նրանք, ովքեր կհավատան սրան և կհրաժարվեն պայքարից, թող իմանան, որ այդ գործատուն չի վճարելու տաս, քսան, երեսուն կամ քառասուն տարի իրենց փոխարեն: Դա լինելու է մեկ կամ երկու ամսվա ակցիա՝ բողոքի ձայնը լռեցնելու համար»,- ասաց Նաիրա Զոհրաբյանը:
Կարդացեք նաև
Նելլի ԳՐԻԳՈՐՅԱՆ
